Tjon-Kock: Polis por para fiesta y confisca ekipo di musica tambe

ORANJESTAD - Polis lo actua cu man duro durante e control di Toque de Queda cu ta inicia awe nochi 11'or. Asina alto comisario di polis Vanessa Tjon Kock a bisa dialuna. Polis nan man lo ta yen, debi na e cantidad di fiestanan cu ta organisa. "Musiconan lo no ta contento cu esaki pasobra a bin cu medida cu awor practicamente bo no por tin fiesta" e alto comisario a sigui bisa. "E momento cu bo ta propaganda un fiesta of ta propaganda e manera con abo como musico ta bay trece  ambiente den un establecimento, automaticamente bo ta bezig ta buscando aglomeracion" sra Tjon a bisa. Esaki ta nifica cu no ta bay tin e posibilidad pa bo organisa ningun fiesta.

PARA FIESTA

Automaticamente bo por tin musiconan si den un establecimento, tambe na e orario stipula pero tene na cuenta cu cuerpo policial ta ripara cu nos ta papiando di fiestanan di establecimento, nos ta drenta y nos ta para bo fiesta". E por ta asina leu cu polis tin e autorisacion cu por confisca ekipo di e grupo, cual segun Tjon, no kier yega na dje. 

FIESTA CLANDESTINO

A bisa cu polis lo drenta cualkier fiesta clandestino y para esaki. Lo tin suficiente polis riba caya cu tin hopi animo pa traha e dianan aki, y lo por actua. Esaki ta significa cu no ta conta solamente pa fiesta, pero tambe por yega asina leu cu e establecimento ta wordo cera. E no ta wordo cera e momento ey so, sino 'tot nader orde'. Tanten cu e establecimento no cumpli cu e protocolnan estableci, e establecimento en cuestion lo no habri.