Na Hulanda a registra cantidad record di partidonan politico

DEN BOSCH – NA Hulanda, ministerio publico a cuminsa confisca cuentanan bancario y auto di esnan cu a causa disturbio durante Toque de Queda valido pa e pandemia. Na Oost Brabant p.e. ministerio publico a pone beslag riba algun cuenta bancario y dos auto. Tambe a bisa cu p.e. si haya huella di un persona den un joyeria destrui, e persona ey ta bira un complice. Henter e grupo ta wordo castiga, y no solamente esun cu nan haya cu ‘e holoshi’. Ministerio Publico tin apoderacion di un hues comisario pa a pone beslag riba e loke a keda menciona. Ora cu e sospechosonan wordo sentencia, nan por usa e loke ta confisca, pa paga e daño. 

DEN HAAG – E Dno tin intencion ainda di pospone eleccion proximo pa Tweede Kamer cu mester tuma lugar na maart proximo. Asina minister di asuntonan interno Ollongren a bisa Tweede Kamer. E importancia pa votadornan por expresa nan mes riba e maneho hibam, ta pisa hustamente den tempo di crisis, hopi pisa!” e mandatario a bisa.   Tin cu mira e desaroyo di e pandemia y lo dicidi fin di februari kico finalmente lo bira e situacion. Si pospone e eleccion, esaki lo tin cu sosode pa medio di un ley y e prome momento despues di maart cu esaki por tuma lugar, lo ta na fin di juni proximo. Actualmente tur ciudad a prepara y ta tene cuenta cu e pandemia y e medidanan tuma, y cu esnan tuma, por tene eleccion sin problema ainda. 

DEN HAAG – Prome minister demisionario Mark Rutte ta condena e iregularidadnan di ultimo dianan. Segun e mandatario, e disturbionan no tin nada di haber cu protesta of bringa pa libertad. Dialuna anochi polis a duna 1741 multa, tur debi cu no tabata cumpli cu e Toque de Queda. Prome cu esey a bira conoci cu a detene 184 persona, mayoria pa e disturbionan. “Nos no ta bay capitula pa algun idioot” minister Hoekstra di finanzas a bisa awe mainta. Como tal a bisa caba cu no ta bay elimina e TdQ debi na e disturbionan.  

AMSTERDAM – Pa di tres dia consecutivo, tabatin disturbio den ciudadnan Hulandes relaciona cu e Toque de Queda cu a inicia diasabra a consecuencia di aumento di e pandemia. Ironicamente e TDQ mester evita di tin hende riba caminda pa evita plamamento di e virus, pero e situacion ta contraproducente. Polis mester a interveni na Amsterdam, Geleen, Rotterdam y Helmond. E TDQ ta inicia for di 9’or tur anochi. Pero parce cu un grupo chikito di persona no ta tene nan mes na esaki y pa cual miles di detencion a keda efectua caba durante e prome 3 dianan di TDQ .

DEN HAAG – Hulanda tin e intencion – maske hopi ambicioso pero perfectamente realisabel si tin bon coordinacion – pa Aruba y henter e parti Caribense di Reino ta full vacuna contra e “Virus di Corona” no mas tarda cu fin di Juni 2021. Asina secretario di estado Hulandes Blokhuis, a indica na minister plenipotenciario pa Aruba na Hulanda Guilfred Besaril como parti di e combersacion riba e programa di vacunacion cu ta inicia 15 di februari 2021 na Aruba y otro islanan di Caribe Hulandes. E noticia aki segun Minister Besaril, ta sigur un primicia cu no solamente ta duna Pueblo di Aruba un empuhe positivo den su lucha contra e pandamia, pero ademas ta brinda nos Isla e perspectiva necesario den su esfuerzo di recuperacion economico.

DEN HAAG – Parlamento di Hulanda (Tweede Kamer) a aproba implementacion di Toque de Queda entrante diasabra awor, pero cuminsando 9’or di anochi envez di 8:30pm. Mayoria di Tweede Kamer a vota pro diahuebs despues di un debate riba e tema, y gabinete demisionario Rutte III a bay di acuerdo cu e cambio aki. Esaki kier men cu entrante diasabra, tur hende (cu excepcion di casonan special) mester keda paden di 9’or di anochi te 4’or y mei di mainta. Segun Mark Rutte, haci e TDQ mas laat cu 9’or no tabatin sentido. E medida mas drastico aki, ta pa combati e variante nobo di e virus Covid19. Potret cortesia ANP.