Bermudez: No tin problema cu supervision, pero con Hulanda kier impone

ORANJESTAD – Gobierno no tin problema pa College Financieel Toezicht (CFT) haci trabou di supervision. De hecho, awe minister di finanza Angel Bermudez ta bisa NoticiaCla.com cu ta un fenomeno rond mundo, y ta parti di bo maneho financiero. “Riba e punto si mester tin supervision, no mester tin discusion den gobierno di Aruba”. E discusion ta, sinembargo con bo ta introduci’e y incorpor’e den henter bo proceso, cu ta cuminsa cu un concepto di presupuesto y su ehecucion.

HULANDA KIER IMPONE

E problema pa gobierno, segun Bermudez, y e discusion ta tambe e manera cu Hulanda kier impone riba Aruba con mester acepta e instituto di CFT. “Esey ta un discusion politico cu ami como un no-politico ta para un banda y wak” Bermudez a sigui bisa. E mandatario ta spera cu pronto gobierno di Aruba lo por yega na un consenso cu Hulanda con tin cu incorpora e supervision aki. Ta referi na e.o. e fiscal council cu por ta un variante di CFT. “Ta eynan bo ta yega cierto momento cu bo tin cu tuma un decision final cu ta na ‘ e forma aki Aruba ta bay incorpor’e”.

PROBLEMA POLITICO

Bermudez ta compronde e problema y e causa cu tabatin den e discusion politico y e forma cu e la wordo poni. “Mester haci e supervision a base di un consenso caminda tur dos partido ta contento cierto momento con e lo tuma lugar” Bermudez ta bisa. Den mesun rosea e ta sigura cu no por hacie manera cu Corsou y St Maarten a haye cu CFT pasobra eynan Hulanda a hinca 4 biyon florin pa sanea nan situacion. Y nan no tabatin otro opcion. “Nos no ta den e mesun barco ey, y pesey politicamente mi ta compronde cu ta dificil pa acepta cu ta mesun reglanan, di impedi, di supervisa Aruba mester tin”.

PAIS CHIKITO VS GRANDI

E hecho cu Aruba ta chikito y Hulanda ta grandi, no ta importante pa Bermudez. “Mi kier yega na un roundup di e topico aki pasobra e ta costando mucho tempo y energia y nos recursonan ta limita” Bermudez a bisa. E ta haya cu no mester bisa pasobra uno ta mas grandi, cu e tin cu domina e situacion. “No ta pasobra bo ta mas grandi, mi ta acepta di bo. No ta asina cos ta bay” Bermudez a bisa. Asina cos tin cu bay cu Hulanda tambe. Loke Hulanda ta grandi aden si, ta experticio, competencia capacidad. Eynan nan tin cu yuda nos” Bermudez a sigui bisa.