Premier Wever a ricibi 2 menasa di morto pa anuncio di medida di COVID19

ORANJESTAD - Algun rato despues cu prome minister di Aruba Evelyn Wever Croes a haci anuncio dificil pa tene Toque de Queda durante dianan di fiesta, incluyendo despues di tiro, el a ricibi dos menasa di morto. Noticiacla a tuma nota di e contenido di e menasa tambe. A compronde cu e mandatario a alerta autoridadnan competente pa atende cu esaki. 

E MENASANAN

Ta trata di dos menasa separa, cu ta relaciona esaki directamente cu e anuncionan haci di awe mainta y dirigi specificamente pa e prome minister, unda cu ta menase di lo tire mata prome cu cambio di aña. Otro ta bisa pa e cana cu bodyguard sino e lo haya tiro tambe. Tur dos menasa ta indica cu e anuncionan no a cay den bon tera cerca e personanan of grupo aki, y kier 'castiga' e prome minister pa a haci e anuncio, considerando cu e ta responsabel pa e decision aki como cabes di gobierno. Mientrastanto e premier ta considera esaki menasanan serio. No ta prome biaha cu e mandatario ta haya menasa, y e ta bou di cuido extra caba pa basta tempo, 'around the clock'. No ta conoci si esaki lo pone cu lo aumenta seguridad rond di su persona y su famia.