Rotonde Las Americas lo haya un facelift porfin!

ORANJESTAD - Despues cu pa varios luna e rotonde den Centro di Oranjestad, oficialmente yama Rotonde Las Americas a pasa berguensa cu varios palo di coco morto, esaki lo haya un 'facelift' pa e por mustra 'bunita' atrobe. Minister di infrastructura Evelyn Wever Croes a participa e informacion aki riba su pagina di Facebook awe. Pero no a duna mas detayes, sino cu solamente lo dune un facelift apropia. Pa varios tempo e rotonde aki tabata decai y un bista hopi mahos. Hopi no por a compronde pakico a dura asina hopi siendo cu e ta un di e rotondenan mas popular y visual na Aruba. Sigur pa nos bishitantenan ora cu nan yega Aruba. Loke lo no mira mas, sinembargo ta e palmanan largo bunita cu a dorna e rotonde pa varios aña. Hopi a comenta caba cu e palonan halto di coco sigur lo haci falta, aunke semper un cambio ta bon bini. Otronan a comenta cu nan ta welcome un cambio, pero cu e cambio cu a keda presenta no ta esun di mas apropia.