Lito Laclé: Si polis no haya melding di fiesta clandestino, no por actua

ORANJESTAD - Tin un cantidad di fiesta clandestino cu a tuma lugar den fin di siman di Pasco, cu ta viola tur regla di COVID19. Algun polis a logra para, pero otronan a bay sin control, cu tur su consecuencia di salud despues. Pa e fin di siman aki atrobe polis ta pidi ayudo di pueblo pa denuncia fiestanan priva ilegal cu ta planea e dianan aki, specialmente riba cambio di aña. "Si nos no haya melding di pueblo di Aruba, nos no por actua riba esaki. Nos ta depende completamente riba pueblo di Aruba pa esaki" vocero di polis Lito Laclé a bisa noticiacla den fin di siman. Unabez cu nan haya melding, por actua. 

FIESTANAN CLANDESTINO

Den fin di siman di Pasco, tabatin por lo menos 5 fiesta grandi clandestino cu a tuma lugar di cual algun polis a sa di desmantela y otronan a bay sin keda detecta. E problema di e fiestanan aki ta cu esaki ta un fuente perfecto pa un brote estilo 'superspreader' di e virus di COVID19. Mientras cu ley no ta permiti prohibi cierto fiestanan priva, tin forma cu por actua. Pero hopi polis no por haci si no tin conocemento di nan. E fiestanan aki ta tuma lugar den lugarnan grandi pero scondi, hopi biaha na residentenan cu tin cura halto y aleja di mas cas. Ta manda invitacion selecta via whatsapp y ta pidi pa no 'sigui broadcast' esaki. Asina mes tin cu toch ta hacie, cu ta pone cu e ta cay den man di polis of otro autoridad. Pa e fin di siman aki, hasta tin lugarnan publico cu ta propaganda fiestanan publico pero den dia, despues di tiro, pa evita marduga. Pero vocero di polis a sigura cu hasta esey ta prohibi ya cu no por toca musica duro, ni cu DJ of banda. Pa e proximo weekend aki, tin por lo menos 2 conoci caba, cu tin banda completo, cu 3 dj y cantidad di actividad mas cu ta programa despues di tiro y ta bay 'solo solo', esta te ora cu solo subi su siguiente mainta.