Containernan cu clapchi a keda distribui for di Wela

ORANJESTAD – Un total di 24 container cu clapchi a keda reparti awe marduga for di e deposito na Wela pa e varios lugarnan di benta di clapchi. Manera tradicion, dia 27 di December marduga, ta tuma lugar henter un operacion na e sitio, unda cu polis ta guia e proceso aki di Wela te na e lugar di distribucion. E proceso e aña aki a bay mucho mas liher cu antes, debi na e cantidad limita di clapchi cu a keda importa e aña aki. Si antes tabata reparti entre 30 pa 40 container di clapchi, e biaha aki segun experto di explosivo pa DOW sr Rubin Ponson, e biaha aki ‘apenas’ 6 container nobo a yega, hunto cu e containernan cu tabatey caba, a pone cu na tur, a usa 24 container pa reparti rond di Aruba. Pues mitar di e cantidad di antes. Esey a pone cu e.o. enbez di cuminsa e proceso na Wela pa mei anochi, a opta pa haci esaki mas laat, esta 4am, pa asina pa mainta 7’or, tur lugar di benta tin nan lugarnan di clapchi. Henter e motorunit di polis a keda usa awe marduga pa e trabou di vigilancia y guia di container y trekker, segun vocero di polis Lito Laclé.