Duaneronan a bay den accion awe mainta

ORANJESTAD – Un grupo di duanero a pone trabou abou awe mainta pa 2 ora, como protesta pa e.o. condicion di trabou, edificio y mas. Segun e presidente di e sindicato SADA cu ta representa e duaneronan, Sharina Hernandez a mustra cu ta constatando varios problema, y precupacionnan a bira mas grandi cu a dicidi cu no ta tuma mas.

PROBLEMA

Entre e problema concreto, Hernandez ta haci mencion di e situacion na e oficina principal, cu ‘ constantemente tin problema cu djaca, y hasta santanero, yiwana’. Esey a pone cu e sindicato a urgi e mandatario encarga (Angel Bermudez) pa busca un solucion pa tur esnan trahando den hoofdkantoor. Tambe tabatin afspraak traha cu minister riba e situacion di airport y waf. “Nos a perde demasiado dienstautos. E lesnan cu ta tardando hopi y tin cu structura esakinan. Anto miembronan cu ta reclama cu SADA no ta trahando. Abase di esey a dicidi awe mainta di pone tur e puntonan aki riba un manifiesto hunto cu tur trahado di douane y a entrega esaki na e minister”.

REACCION MINISTER

E minister ta na altura di e problema y a sigura e sindicato cu a instala dos comision caba cual tin cu traha riba e verhuizing for di e hoofdkantoor. Pero tambe tin un comision cu tin cu traha pa un edificio nobo na barcadera cu tin añas para. Awe merdia 3 or e mandatario ta reuni cu e sindicato riba e topiconan aki.