Buelo directo di Inglatera pa Aruba mañan ta sigui normal!

ORANJESTAD - E buelo directo entre Inglatera y Aruba planea pa diaranson awor, ta continua normal. Asina e portal aki a compronde. E decision oficial a cay dialuna atardi y a dicidi pues cu ta laga e un buelo aki sigui normal, y lo evalua despues kico lo ta e siguiente pasonan. E noticia di e variante nobo di e coronavirus COVID19, a pone cu mester a reuni mirando cu esaki tabata di Inglatera. Y cu e buelo, e chens lo tabata cu por a 'exporta' esaki pa Aruba. Pero despues di evaluacion cu e CRISIS team, a opta pa toch laga e buelo continua. Manera ta conoci, recientemente TUI a anuncia cu nan ta cuminsa cu un buelo directo pa siman pa Aruba. Y esaki ta tur diaranson. No ta conoci si e buelo di otro siman ta sigui.