Sin Hulanda, Aruba no por a paga su gastonan na inicio di 2021

ORANJESTAD - "Aruba no tin placa!". Asina prome minister di Aruba Evelyn Wever Croes a confirma dialuna na e portal aki. "Bo conclusion cu sin e placa aki (e voorschot cu Hulanda ta duna Aruba pa e prome 6 siman di 2021) Aruba no ta make it, ta un conclusion corecto!" e mandatario a sigui bisa, contestando pregunta di e portal aki. Secretario di estado Raymond Knops a bisa Tweede Kamer cu Aruba no tin fondo, y pesey e urgencia pa duna placa sin cu tin un 'acuerdo' pa e 4e tranche cu mester cubri e prome cuartal di 2021. Den comparacion cu Corsou y St Maarten, Corsou no a haya voorschot pasobra nan ainda tin placa den caha, y St Maarten no ta haya nada mes, pasobra ainda no tabatin un acuerdo cu Hulanda. Pero a compronde mientrastanto cu awe mainta 10'or St maarten tambe a firma cu Hulanda. 

BANCAROTA

Mientras cu no ta usa e palabra 'bancarota', e situacion si ta(bata) describi asina pa e mandatario Hulandes, pa hustifica e urgencia pues di fia e placa. Y premier Wever, no a desmenti ni basila y a bisa mesora cu ta berdad, cu sin e ayudo aki, Aruba lo tabata bon pega. Debi na e situacion financiero, causa tambe e.o. pa falta di entrada den caha di gobierno debi na e crisis, Aruba no por para riba su pia financieramente ainda. Mester pensa riba pago di salario di ambtenaar, gastonan operacional, ayudo financiero manera Loonsubsidie, FASE, y tur otro cosnan cu gobierno ta haci normalmente. Entre nan tin e bijstand, cuido di salud, testnan di COVID19, orden publico, enseñansa y mas. "Nos so no ta make it caminda cu nos ta!" e prome mandatario a sigui bisa. Y ta pesey a firma e acuerdo cu Hulanda recientemente. "E ta un conclusion corecto cu e placa ta hopi necesario pa e prome cuartal di e aña aki" e mandatario a sigui bisa. 

CIFRA TOTAL

E mandatario no por a duna e cifra for di cabez ainda pero e ta mas of menos double di 71 miyon florin, cu ta mas of menos 140 pa 150 miyon florin.