Aruba no ta implementa medida nobo awor, pero lo monitor e situacion si

ORANJESTAD - Gobierno no ta bay implementa medida nobo awor, pero lo monitor e situacion si. Asina prome minister Evelyn Wever Croes a bisa durante e conferencia di prensa semanal.  E mandatario a repasa cu awe tin 160 caso activo di Covid y nos tin awe un averahe di 16 caso nobo pa dia. Siman pasa e tabata 12 caso nobo pa dia. Nos a cuminsa luna di December cu 122 caso activo y e cantidad ta fluctua, pero awe nos ta na 160 caso activo, pues un aumento. P’esey e mensahe ta pa tur hende cuida, mas ainda. 

NO TA IMPLEMENTA MEDIDA

Prome Minister a duna di conoce cu Gobierno no ta bay implementa medida nobo awor, pero lo monitorea e situacion si, pa mira si e aumento cu ta detectando ta exigi ahuste den e medidanan. 

SIGUI CUIDA 

“Laga nos balora tur e sacrificionan cu nos ta haciendo, pasobra awe e ta bastante bou di control, no pa suerte sino pa decisionnan dificil. Awor nos ta recordando poco poco cu ta sacrificionan grandi cu nos tur a haci, a percura cu nos ta aki para. Porfabor no laga nan bay perdi. Na nomber di Gobierno y Pueblo di Aruba, faltando algun dia pa ta Pasco, mi ta pidi tur hende pa nos balora tur e trabou y sacrificio inmenso di miles di persona cu a traha pa cuida nos tur y haci bo bida y di bo famia mas facil cu mas siguridad y trankilidad. Ban sigui cumpli cu e disciplina y e reglanan, sea ta na trabou, haciendo compras of na cas durante dianan di fiesta.