Mariniernan di Aruba na Bonaire pa proteha contra atake di capo di droga

KRALENDIJK/ORANJESTAD – Un grupo di marinier basa na Aruba, (posible 50) a yega Bonaire pa yuda proteha e isla di un posibel atake riba e isla di flamingo, relaciona cu un menasa di un capo (Druglord) di droga. Manera ta conoci, algun dia pasa (manera cu NoticiaCla.com a raporta), autoridad a pone man riba un lote grandi dilanti costa di Bonaire, di droga. E boto lo a bolter, y e droga a keda confisca. Awor tin informacion cu e capo di droga na cual e droga tabata pertenece, ‘kier su droga bek’, y lo a menasa cu e lo bin ‘busca esaki na Bonaire’. Y esaki tabata suficiente pa envolvi asistencia di marina real.

Como tal a haci solicitud di marina di otro islanan pa asisti e isla cu proteccion. Un grupo di marinier di Aruba a sali pa Bonaire y a yega mientrastanto, cu e intencion pa duna e proteccion necesario. No ta conoci si for di Corsou tambe tabatin mariniernan cu a bay, ya cu ora di asistencia, ta mariniernan di Corsou mas parti ta haci esaki.

Informacion tambe cu NoticiaCla.com a compila ta mustra cu tin mariniernan cu a yega for di 3 dia pasa, y ta campando rond di costa di Bonaire. For di ayera mas bulto di droga a spula subi tera, hunto cu barinan di gasoline y awa. Loke tambe a confirma ta un curpa cu a drief, cu lo ta di e boto go-fast, cu a bolter. Fotonan di archivo di Aymed Ayubi ta di ora cu e boto go-fast a wordo gara.