RMR a aproba 71 miyon pa Aruba pa prome 6 siman di 2021

DEN HAAG/ORANJESTAD - Rijks Minister Raad (RMR) diabierna ultimo na Den Haag a autorisa un suma di 71 miyon florin pa Aruba como 'adelanto' riba e siguiente prestamo di ayudo pa COVID19. Asina secretario di estado Hulandes Raymond Knops a informa Tweede Kamer diabierna den un carta. E suma menciona ta un 'voorschot' riba e suma total di e necesidad di likidez pa e prome cuartal di 2021. E suma total ainda tin cu wordo determina pa e colegio di supervision financiero di Aruba CAft. 

TERMINO

E suma menciona di 71 miyon florin (35.5 miyon euro) ta cubri e prome 6 siman di e prome cuartal di 2021, esta 1 di januari te 12 februari 2021. Unabez cu e suma total keda determina, lo desconta e suma di 71 miyon di e suma total. A dicidi pa duna e adelanto segun Knops pasobra e situacion di likidez di Aruba pa januari ta asina malo cu no por warda te e deadline pa realizacion di e condicionnan poni pa e di 3 tranche. 

CUMPLIMENTO

Fuera di determina e suma total pa e prome cuartal pa CAft, y determina si Aruba a cumpli cu e condicion di e di tres tranche, RMR mester tuma un decision final positivo.