Cambio atrobe den Caiso y Soca festival otro siman

ORANJESTAD – Un biaha mas Caiso y Soca Festival 2015 ta conoce cambio den su programacion. Un reunion di urgencia dialuna anochi a pone cu a dicidi di trece cambio den e dianan cu lo tene e festival y tambe e final. Si algun dia pasa ainda a dicidi cu e festival ta tuma lugar riba dos dia, esta diahuebs 29 y diasabra 31, esaki a cambia atrobe. Awor lo tene dos anochi di prefinal riba dianan 28 y 29, y e final dia 31. E motibo ta basa riba conseho y critica cu a bin tende di tanto musico como participantenan. Un di e precupacionnan presenta tabata e hecho cu a separa e dos ritmonan for di otro, y e otro ta e cantidad grandi di cantica cu lo mester a keda presenta riba un solo anochi esta dia 31 di januari, cu consecuencia cu e lo por a termina hopi laat. Pues e festival ta bay bek na 2 anochi di prefinal y un anochi di final. E final lo ta tanto Caiso como Soca. E prefinal lo cuminsa pa 7or y e final ta diasabra cu lo ta 8pm. E intencion ta pa cualifica un total di 10 caiso y 15 soca cu ta wordo presenta atrobe e diasabra ey, 31 di januari den e carnival village.

Tabata siman pasa cu a raporta cu mientras cu e  nomber di cantante y bandanan pa e proximo Calypso y Roadmarch contest, conoci como Caiso y Soca Festival 2015, ta conoci, e fecha di e finalnan a cambia e momento ey caba. NoticiaClal.com e dia ey a haya confirma cu e Caiso (18 cantica) lo tuma lugar riba 29 di januari y esun di Soca (Roadmarch cu 60 cantica) lo tuma lugar riba 31 di januari. E cambio ta haci pa asina por 'baha gasto', NoticiaCla.com a compronde. Pa por logra pa e festival caba toch un ora 'rasonable', lo pone dos ekipo di zonido riba un solo stage grandi. Un otro cambio ta cu lo no tin e acostumbrado PPV (Pay Per View) localmente pero solamente pa esnan internacional. Pero awor pues, e ta cambia bek pa e informacion menciona mas ariba. Foto ta di archivo di siman pasa ora cu tabatin e inscripcion.