Partido politico Futuro Nobo awor yama partido Accion 21

ORANJESTAD - Oficialmente Aruba tin un partido politico nobo. De hecho, e partido tabata uno conoci caba, pero bou di otro nomber, Futuro Nobo. Y asina e partido y su lider a keda presenta na e portal aki algun luna pasa. Pero awor parce cu esaki a cambia di nomber y ta bira Accion 21. Segun e comunicado ricibi di e partido, esaki ta splica cu despues di varios luna cu Sr. Miguel Mansur ta circulando den medionan social y prensa cu su ponencianan politico, economico y social, na unda ela a comparti su ambicion di eherce politica na su isla natal. Despues di hopi sondeo y participacion cu miembronan den tur area den nos comunidad a nace e prome partido cu ideologia liberal progresivo di Aruba bou di e nomber Accion 21. 

AMBICION

“Mi ambicion personal semper tabata y ta pa trece solucion na problemanan existente di nos pais y asina haya e miho forma pa nos por biba segun nos potencial maximo den forma rendabel y sostenibel. No obstante, e partido su ideologia a wordo crea a base di e sentimiento y deseo di e comunidad di Aruba. Un deseo pa tuma un rumbo nobo y diferente cu esun social democrata cu ta reinando. Un rumbo unda tur hende tin acceso na nan derechonan den forma realistico, husto y sostenibel bibando segun nan potencial individual, sin lubida esnan desampara pa via di burocracia y discriminacion sistematico” Sr. Miguel Mansur ta declara. 

PLENO DESAROYO

“Nos ta den pleno desaroyo di Accion 21 su plan di maneho y subsecuente actualisacion di nos estado segun e temponan cu nos ta bibando aden. Por lo tanto por spera mas den transcurso di cuminsamento di 2021, unda lo revela nos plan pa progreso nacional. E progreso cu henter Aruba merece”, Sr. Miguel Mansur ta finalisa.