Trahadornan na dos compania a protesta pa motibo di bonus

ORANJESTAD - Trahadornan na dos diferente compania a bay den accion diabierna mainta pa e mesun motibo. Pago di bonus. Tanto trahadornan di e compania di cater cuminda Calloway, como e compania di transporte local Interport a dicidi awe mainta trempan pa pone trabou abou debi cu compania no kier paga bonus. Mientrastanto na ambos compania, combersacionnan a sigui despues pa wak si ta yega toch na un solucion satisfactorio pa e trahadornan.

CALLOWAY

Na Calloway tabata basta dia caba pendiente pa un accion debi cu e situacion no tabata positivo. For di siman pasa diabierna tabatin accion planea cu a keda posponi varios biaha. Pero finalmente a dicidi cu ta pone trabou abou awe mainta como protesta. Tambe tabatin situacion unda cu trahadornan a usa nan auto personal pa blokea e entrada di e compania pa evita cu e operacion di transporta cuminda por sigui.  Mes momento, segun e trahadornan, e gerencia lo a prohibi e trahadornan cu tabata den e edificio e momento ey, pa sali pafo. Algo cu segun Jose Figaroa di FTA ta ilegal. No a logra haya e version di Calloway riba e situacion.

FTA

E problema segun sindicato FTA, ta cu tin un acuerdo (CAO) cu ta dicta cu mester paga bonus na e trahadornan. Ta na conocemento cu tin situacion dificil pero sabiendo di antemano cu tin un bonus pa paga, bo no ta purba genera poco poco, pa paga bonus. Esey ta loke e compania a haci segun e representante di FTA Rudy Geerman, esta cu e compania no a pone placa un banda tur luna pa por awor paga e bonus, sino a warda te na final cu no ta paga bonus. E trahadornan segun Geerman tin hopi pasenshi, unda cu a sinta na mesa pa 2 biaha caba sin cu por a yega na un solucion. E trahadornan a dicidi cu ta bay acepta 60 porciento en bes di 100%. A bisa cu tanten no haya un carta di gerencia cu ta paga e bonus, no ta bay drenta paden. 

INTERPORT

Na Interport e accion a inicia mas tempran, unda cu trahadornan a bay para pafo, respalda pa nan sindicato FTA. Segun e version di e sindicato, inicialmente e compania no kier a paga bonus, y a duna nan un bon di supermercado. A protesta y despues a bin un contra oferta di un bonus, pero no manera cu ta custumber. E trahadornan no a acepta, alegando cu segun informacion cu nan tin, e situacion financiero no ta malo y de hecho e aña aki den pandemia tabata miho cu e añanan anterior. 

REACCION INTERPORT

Un rato despues, e abogado pa e compania Darin Crouch a splica cu e alegacion di e trahadornan no ta cuadra. Ta lamenta cu net cu Pasco dilanti porta y cu clientenan mester nan mercancia, e trahadornan ta dicidi di bay den accion. A considera e accion uno ilegal, pero mes momento ta respeta e derecho di e trahadornan pa bay den accion. A bisa cu lo permiti e sindicato pa nan protesta pa 1 ora. Mester bisa cu e accion a cuminsa for di 8'or awe mainta y pa 10'or ainda e accion tabata andando. E hecho cu e situacion e aña aki ta miho cu e añanan anterior no ta berdad segun sr Crouch. E cifranan no ta mes bon y como tal no por pensa cu automaticamente ta haya un bonus. E bonus ta basa riba e forza financiero di e compania y e prestacion di e trahadornan. No ta compronde e disgusto si mira cu a ofrece un suma aunke no similar na añanan anterior, pero si un bonus. Pues no cu a keda sin paga nan nada. E situacion ta uno di pandemia unda cu cada compania mester mira pa nan sobrevivencia. Y esaki a pone cu e compania a actua di e forma ey. E enfoke di e compania segun sr Crouch, ta cu e prioridad ta pa e trahadornan haya nan salario paga. Y e bonus ta despues. A haci un contra oferta y ta spera cu e trahadornan acepta esaki.