A prohibi homber hulandes posiblemente infecta cu Ebola, entrada na Corsou

WILLEMSTAD – Un homber hulandes cu por ta infecta cu e virus Ebola, y cu tabata residencia na Merca, a wordo prohibi pa biaha pa Corsou. Esaki segun e website CuracaoChronicle ta raporta cu ministerio di asuntonan general di Corsou a participa awe. E anuncio a bin despues cu e conseho di minister di Corsou y e epidemiologo Izzy Gerstenbluth a reuni. E director di maneho pa risico y desaster, Lesley Fer tambe tabata presente durante e reunion ey.

E homber di nacionalidad hulandes, ta wordo monitoria pa autoridadnan mericano. “Conseho di minister, despues di a tende tur e argumentonan medico, tecnico y legal, y despues di deliberacionnan interno a dicidi cu no ta permiti e persona entrada na Corsou, ‘por lo pronto’ na bienestar di salud publico” e ministerio a laga sa. E potret ta di archivo, ilustrando dos trahado cu proteccion pa ebola.