Corte: Jan de R. y su fundacion mester rectifica contra yiu di Prome Minister Wever

ORANJESTAD - E conocido ciudadano Jan de R, y Fundacion Nos Ta Aruba tin un siman di tempo pa rectifica nan declaracion contra yiu homber di prome minister di Aruba, esta Kevin W. Asina Corte a dicta diaranson den e caso. No cumplimento di e veredicto, por resulta den un multa diario of parti di dia di 500 florin pa dia te na un maximo di 250 mil florin. Y e rectificacion tin cu bay via e portal 24ora.com e prome diahuebs despues di cu e sentencia wordo presenta na nan. 

E CASO

E caso a keda presenta den dos diferente dia, ya cu ora cu a cuminsa cu e caso riba e prome fecha, (4 December 2020), a suspende e caso y a trata esaki bek dia 7 di December 2020). E caso entama pa e yiu homber di nos prome minister, tabata pa e partido contrario rectifica e acusacionnan considera como serio pa e yiu homber. Ta trata di acusacion relaciona cu e negoshi di cannabis, benta y mas cos rond di e negoshi aki y cu ta inclui supuestamente hasta su mama, esta premier Evelyn Wever. 

PRUEBA

Como prueba, e ciudadano de R. a anuncia cu boca grandi (segun Corte), cu e lo tin prueba di e actonan pa cual e ta acusa e yiu homber y cu e lo presenta nan den corte. Sinembargo a resulta cu e pruebanan presenta, no tabata comproba of sostene e acusacionnan di de R. Algo cu Corte (segun e sentencia) a tuma de R. hopi na malo. Esta cu e ta grita duro pafo cu e tin prueba y ta sigui atacha nomber di e yiu homber, pa despues bin resulta cu e supuesto pruebanan no ta comproba nada di e declaracion. E pruebanan presenta, ta algun grabacion di voz pero for di esaki, Corte no por a determina e culpabilidad di e yiu homber. Ademas Corte ta mustra cu durante e caso, (contrario na ponencia di dr R.) no por a saca afor si de R. a papia solamente na nomber di e fundacion of si ta personalmente tambe. De hecho, de R. ta haci mencion un caminda cu ta na nomber di su fundacion, pero tambe personalmente. Pues como tal, de R. personalmente tambe ta responsabel pa e caso aki y mester haya castigo. Segun Corte, pa un hende haci un acusacion asina serio contra un otro persona, e mester tin prueba contundente, pero cu den e caso aki no a keda proba. Como tal Corte a dicta cu tanto sr de R. mester rectifica e declaracion aki via e medio 24ora.com (anteriormente a pidi tambe pa hacie via e matutino Antiliaans Dagblad pero de R. a bisa cu e no tin entrada na e medio ey. E yiu homber W. a bisa cu e ta ok cu e rectificacion sosode solamente na 24ora.com.  Pa sigura cu de R. ta cumpli cu e sentencia, e huez en cuestion a impone un multa di 500 florin pa dia pa of parti di dia cu sr de R. no cumpli cu e sentencia, te na un maximo di 250 mil florin. Huez a stipula e texto tambe cu de R. mester papia, y e no por desvia ni añadi algo mas na e texto di rectificacion. Pa e sentencia, lesa esaki AKI.