DVG: Sigui misa di Aurora via television of online pa evita aglomeracion

ORANJESTAD - Departamento di Salud (DVG) ta recomenda comunidad di Aruba pa sigui misa di Aurora via television of online, envez di bay personalmente. DVG ta reconoce cu awe e misanan a cuminsa y cu hende kier bay e misa manera ta custumber. "Nos tur sigur kier probecha pa gradici nos Creador pa e aña cu ta cabando. Un aña cu a trece hopi reto, pero nos no por lubida y haci manera cu e pandemia a pasa, pasobra esaki no ta e caso" e comunicado ta sigui bisa. "Den e ocasion aki, Departamento di Salud Publico Aruba kier invita nos comunidad pa mas tanto, wak e trasmision via television of online. Asina nos ta evita aglomeracion, cantamento den grupo grandi y plamamento di Covid-19 atrobe". Y finalmente, sigui tur recomendacion y medida di proteccion na tur momento, y  ban disfruta di dianan di fiesta sano y sigur den union familiar".