Quantun y Eagle LNG: Hopi promesa pero nada concreto

ORANJESTAD - E intencion di e conferencia di prensa diamars atardi na ocasion di firmamento di e Letter of Intent entre e companianan Quanten LLC, Eagle LNG y Refineria di Aruba (RdA) tabata pa purba crea mas claridad riba hopi duda cu tabatin. Pero e realidad ta cu hopi claridad no a bin. Posiblemente pasobra ainda e proceso ta den su inicio, y tin cu ainda negosha cierto detayes. Como tal a tende solamente hopi promesa di parti di representantenan di e compania di cu kier florece Aruba etc, pero nada concreto. Entre otro, e suma biyonario cu a keda menciona di 3.5 dollar, a bin dilanti, pero no por a bisa exactamente cuanto di esey lo bay inverti. Esaki pasobra a crea e inversion cu lo a bay usa 3.5 biyon den e proyecto. Pero awor a resulta cu e suma menciona, ta uno cu nan tin poni como maximo disponibel pa e proyecto, pero no cu esaki necesariamente lo ta e suma cu lo inverti. Segun sr Meyers, ta depende con cos ta bay y cu mira cu mester mas, lo inverti mas. Pues e suma final, no ta conoci. 

FORZA FINANCIERO

Mas ainda, no a haya e siguransa cu e placa enberdad ta disponibel otro cu loke e presidente interino di RdA (Renny Arends) a purba splica, cu e 'unico' informacion cu e tin di e forza financiero di e companianan, ta documentacion cu a keda presenta na nan durante nan presentacion, y un garantia di banco. E pensamento cu gobierno Mericano ta para garantia financiero pa e compania, no ta e caso tampoco, manera cu e representante di Consulado Christian Olson a splica via ZOOM for di Corsou. "Consulado no ta haci esaki" Olson a clarifica. Loke nan a haci ta recomenda e companianan aki na gobierno di Aruba, pero no ta usual pa gobierno para garantia pa companianan.

PRODUCION Y PRODUCTO

E intencion segun representante di Quantum LLC, Jeff Meyers, ta pa e operacion yega na e nivel di produccion cu Valero tabatin ultimo di 260 mil bari pa dia. Pero, ainda no sa tampoco di unda ta bay haya e crudo pa refina. Ademas, no ta Quanten ta bay haci esaki (e operacion di e refineria) sino un operador global di refineria, pero no sa ainda ken esaki lo ta. Segun sr Meyers, e intencion ta pa e compania cu 'haya e trabou', traha cu esnan cu ta dicta riba mercado e momento ey, y nan intencion ta pa cera deal cu varios pa no ta mara na solamente un of dos proveedor. Pero ainda no por a duna un siguransa di unda. E pregunta a bin mirando cu e ekiponan tabata traha pa procesa e crudo procedente di Venezuela. Sr Meyers a sigura cu e lo no ta di lugarnan cu tin sancion riba nan (refiriendo na p.e. PDVDSA). "E detayes ey, mester traha ariba ainda" sr Meyers a sigui bisa. 

COMPANIA SERIO

Un di e dudanan cu tin den comunidad ta cu e companianan menciona no ta serio y no tin e experticio necesario. Esaki den sentido cu e ta 'too good to be true', y no ta companianan serio. A cuestiona e seriedad e.o. basa riba e 'track record' di e compania Quanten cu den pasado a haci intento pa cuminsa opera na tanto Aruba como Corsou, y cu e.o. un di e personanan di e compania, ta mas conoci como un promotor di concierto cu a organisa e conciertonan di Soul Beach Music Festival. Pa loke ta e track record y trabounan cu tabatin duda ariba, tabata pa proyectonan relaciona cu panel solar. Riba pregunta di e portal aki, tabata e representante Karl Welsh cu a sigura cu nan ta un compania serio. "Wak nos aki. Nos ta serio. Nos ta aki cu gobierno di Aruba pa yuda diversifica Aruba su economia" Welsh a bisa den un forma defensivo. Pa loke ta e pasado, Welsh a mustra cu e tempo ey (na 2012), ta gobierno di Aruba no tabata kier nan. Di parti di gobierno, a bin compronde cu no a duna e compania ey chens, pasobra a opta pa haci negoshi e tempo ey cu CITGO. Sr Welsh a admiti cu enberdad a purba na Corsou pero aki no tabatin interes. A sigui insisti cu nan ta un compania serio, solido cu tin medionan financiero pa haci un bon trabou pa Aruba, contal cu Aruba permiti nan haci esey. Y segun sr Welsh, e gobierno aki si a mira den nan, e potencial y pesey nan ta aworaki presente.