Hulanda a pone tur pais di mundo riba codigo oraño!

DEN HAAG - Hulanda a pone henter mundo riba codigo oraño, fuera di islanan Aruba, Bonaire y Sint Maarten cu ta bay di geel pa oraño. Prome minister Evelyn Wever Croes a confirma cu durante su combersacion cu secretario di estado Hulandes Raymond Knops, cu esaki enberdad a sosode. Segun e mandatario, no tabatin motibo epidemiologico pa pone nos isla riba codigo oraño, pasobra nos tin e situacion di COVID19 bou di control. Pero na Hulanda e situacion ta full diferente y gobierno Hulandes kier a manda un mensahe cla pa su hendenan y mundo henter. 

EFECTO PA ARUBA

E situacion ta conta tambe pa nos studiantenan na Hulanda cu si nan dicidi pa bin Aruba, esaki ta riba nan propio riesgo. Si algo pasa, Hulanda no ta obliga di manda busca bo bek. Y si bo tin seguro, esaki no ta cubri bo tampoco den e caso aki. Biahamento no ta prohibi, pero ta desrecomenda pa biaha. Wever Croes ta lamenta e decision di Hulanda pero ta compronde e situacion perfectamente.