Tumba Festival 2015 dedica na rumannan Chencho y Franklin Kelly

ORANJESTAD— E aña aki e festival di tumba ta dedica na e dos rumannan Chencho y Franklin Kelly. Diasabra awo, 24 di januari 2015 ta bay tuma luga Tumba Festival Aruba 2015 y e aña aki e ta ser dedica na e rumannan Chencho y Franklin Kelly. Pueblo en general ta invita pa bin disfruta di un anochi di goso, musica, creacion y ritmo den Entertainment Center

Chencho Kelly

Chencho Kelly ta un musico percusionista profesional cu a cuminsa su carera como musico na un edad relativamente hoben di 15 aña. Chencho a lanta y crece den un famia musical y a cuminsa desaroya su musica riba Bongo, Campana y mas despues e la cambia pa Timbal, Drums y Tambora. Chencho tabata forma parti di e orkesta Los Juveniles, La Nueva Fuerza y Vicente Kelly y Los Pimentosos. Chencho a cuminsa participa den Tumba Contest for di den añanan 70, di cual Los Juveniles cu a logra bay cu e titulo di Rey di Tumba na 1976, 1977 y 1978. Den transcurso di aña el a sigui participa den tumba contest cu diferente grupo musical como timbalero y activo cu La Nueva Fuerza y Los Pimentosos. Chencho a forma parti di e agrupacion musical cu tabata acompaña nos Tumberitonan tambe el a forma Parti di e All Star Band cu a representa nos musiconan cantante pa e Tumba Festival ABC den Corsow Festival Center na 1990.

Desde 1992 Checho Kelly ta traha na Departamento di Cultura Aruba (DCA), na 2002 el a bay Hulanda y na 2006 el a gradua pa su Bachelor of Arts na Rotterdam Conservatorium (Codarts) Hulanda, actualmente e ta Lider di Investigacion den departamento di Investigacion y Documentacion na DCA. Na Europa el a haci presentacionnan cu diferente grupo musical den Europa. Tambe el a haci grabacionnan di tanto LP’s como CD’s como percusionista. Actualmente e ta keto bay activo y ta dirigente di Grupo Zjilea y propietario di Zjilea Band.

Franklin Kelly

Franklin Kelly un musico cu a cuminsa su carera como musico na un edad relativamente hoben di 12 aña. Franklin a lanta y crece den un famia musical y a cuminsa desaroya su musica riba su Conganan. A forma parti di e orkestanan manera Los Juveniles, La Nueva Fuerza y Vicente Kelly y los Pimentosos. Franklin a cuminsa participa den Tumba Contest for di den añanan 70, hunto cu e orkestanan menciona di cual Los Juveniles a bay cu e titulo di Rey di Tumba na aña 1976, 1977 y 1978. Den Transcurso di añanan Franklin a sigui activo den tumba contest cu La Nueva Fuerza, tanto tumba grandi y di Tumberitonan, tambe a sigui participa cu Vicente Kelly y Los Pimentosos. Actualmente Franklin ta activo keto bay como Conguero free lancer.