Encuesta: Reapertura refineria ta positivo y ta genera trabou

ORANJESTAD - Segun e ultimo encuesta di noticiacla cu e tema di refineria, mayoria di esnan cu a participa, ta ok cu e idea (52%). Mester bisa tambe cu den districto di Noord y Oranjestad cu den otro encuestanan semper ta mustra di ta vota di un forma diferente cu tur otro districto, aki e gruponan tabata un poco mas "progresivo" unda cu nan a bisa cu nan ta menos positivo riba e idea. Pero, esaki no kier men cu nan no ta positivo 'at all', ya cu mayoria ta positivo aunke menos, compara cu e otro districtonan. En general, e opcion Hopi Bon y Bon a domina riba e tema aki, practicamente den tur seccion di edad y districto.  

EDAD Y DISTRICTO

Pa loke ta e seccion di edad y districto, den ambos e opcion Hopi Bon y Bon ta sobresali. Den e seccion di ni satisfecho of desatisfecho, nan ta bisa cu nan tambe ta positivo, pero a bisa esaki pasobra nan falta informacion. Pues pa loke ta e informacion cu nan tin awor, nan ta scoge positivo.   . Pues, en general, por bisa cu mayoria di esnan cu a participa, overall e tabata un pensamento positivo pa cu e noticia di refineria.

MOTIBO

E motibo cu mas a resalta di esnan positivo tabata cu e noticia di e reapertura y e dos companianan menciona, ta cu e ta genera trabou. Mientrastanto esnan cu no tabata positivo, e parti cu a haye sea malo of hopi malo, ta considera esaki un stunt politico pa eleccion di 2021. Pa e encuesta aki, un total di 932 persona a participa, di cual mayoria (73.92%) tabata homber. E districto cu tabatin mas participacion tabata Oranjestad (23.24%), mientras esun cu menos participacion tabata Savaneta (12.43%).