Raoul Cohen Henriquez (DFM) tabatin un curazon grandi y conoci pa su generosidad

ORANJESTAD - For di momento cu e noticia tristo a drenta diasabra ultimo cu e conocido ciudadano y comerciante Raoul Cohen Henriquez (65) a bay sosega, rednan social a keda inunda cu reaccionan di shock, tristesa pero tambe di hopi aprecio. Apenas un dia despues di a cumpli aña, Raoul Cohen Henriquez a fayece diasabra, despues di tabata lucha cu su salud pa basta tempo. E portal aki a compronde di famianan cu, loke a resalta e dianan aki basa riba e reaccionan ricibi, ta cu no obstante e hecho cu e tabata conoci pa tin un caracter fuerte y firme, cuanto bida y curazon el a toca durante su bida. Y mas ainda, con generoso e tabata cu asina hopi hende. Asina un di su yiunan a comparti cu e portal aki. Mientrastanto a compronde di famia cu e acto di despedida lo tuma lugar den seno familiar. 

Durante su bida, sr Henriquez, of Raoul, manera tur hende tabata simplemente yame, fuera di su bida ocupa di comerciante, a sa di respalda un sin fin di persona, y awor esaki ta resaltando cu tur e atencion cu e famia ta hayando. E tabata propietario di varios establecimento comercial cu a marca historia na Aruba. Entre esnan mas conoci, ta e restaurant Chez Mathilde. E tabata propietario di e.o.  Aruba Trading y te hasta Burger King pa un tempo. Ademas el a sa di respalda su señora Landa, awendia popularmente conoci como Mujer Cuarenta cu su soño musical, y e amor ey, el a demonstra te na final. Su cas tabata semper habri pa actividadnan cultural y familiar. Raoul Henriquez ta laga atras, su casa Landa, yiunan Joseph, Daniela, Marc, Adriana y Sidney. Cu Raoul sosega na paz.