Awe RDA ta firma letter of intent cu consorcio Quanten y Eagle lng

ORANJESTAD - Awe tardi Refineria di Aruba (RDA) ta firma letter of intent (LOI) cu consorcio Quanten y Eagle lng. Siman pasa a anuncia e Request Expression of Interest pa e refineria y otro actividadnan na San Nicolas.  E consorcio Quanten a entrega un oferta pa reapertura di e refineria y e compania  Eagle a entrega un oferta pa bay traha cu LNG pa asina por haci e refineria hopi mas factibel.  

FIRMAMENTO LOI

E dos companianan aki segun gobierno di Aruba, a wordo scogi pa un comision cu ,- segun gobierno- , ta totalmente independiente, cu ta consisti di expertonan local y internacional riba e tereno di crudo/ refineria. Tambe un abogado local pa atende e aspectonan legal, un persona cu ta traha na departamento di asuntonan economico pa trata e impacto economico y un ingeniero cu ta trata e tema di medio ambiente.  Prome Minister Evelyn Wever-Croes a splica cu conhuntamente cu e comision aki, a presenta e dos proposicionnan na Parlamento siman pasa. Awor ta asina leu cu awe diamars 15 di december 2020 lo tin firmamento di Letter of Intent (LOI) entre Refineria di Aruba (RdA) y e consorcio Quanten y e compania di Eagle LNG. Pa cual prensa en general lo ta invita. 

COMENTARIO, CUESTIONAMENTO Y CRITICA

Durante e fin di siman, a bin diferente critica y cuestionamento di oponentenan. Pa cual Premier Wever-Croes ta di opinion cu ta bon pasobra pa hopi tempo no tabatin cuestionamento of critica riba e tema di refineria. Prome Minister: “Desde cu mi tabata den oposicion y vooral na 2016 ora cu nos a trata e contract cu Citgo, demasiado hende tabata trankil y no tabata interesa pa sa kico tin den e contract ey. Nos tabata masha poco hende cu tabata critico y ta contento pa mira cu awo tin mas hende critico pasraob esey kiermen cu tin mas hende alerta y esey ta pone cu ta cos bon so por sali for di dje.” Pa locual ta trata e Parlamentarionan cu ta cuestiona y bisa di no ta kere cu esaki ta algo realistico, Prome Minister ta puntra compara cu kico? Si ta compara cu Citgo, of compara cu nada? Pasobra na e momentonan aki Aruba tin nada. Y ora cu tabatin Citgo cu tampoco tabata algo. P’esey desde cu a drenta den Gobierno, e mision tabata pa sali for di e contract cu Citgo cual a logra e aña aki. Pa porfin sali for di e situacion caminda cu Citgo tabatin nos pilar economico rehen.