Awe Aruba mester cumpli cu prome condicionnan acorda cu Hulanda

ORANJESTAD  - Awe riba 15 di december 2020, Aruba mester cumpli cu e prome set di  conducionnan cu el a bay di acuerdo ora cu a firma e acuerdo cu Hulanda un luna pasa na Hulanda. Unabez cu Aruba a firma e acuerdo cu Hulanda na November ultimo, esaki a nifica cu mester cuminsa cumpli cu condicionnan acorda, conforme un time frame stipula entre e dos paisnan. Y awe un di e deadlinan ta vence. Entre nan tin implementacion di e landsverordering LTU-V pa famianan di trahadornan Hulandes y otorgamento di autoridad na Hulanda pa por haci investigacionnan criminal independiente. 

CONDICIONAN

Manera indica, entre e condicionnan ta stipula cu entrante 15 di December 2020 (awe) Aruba mester implementa e landsverordening Toelating, UitzettingenVerwijdering(LTU-V) pa asina familiar nan di funcionario publico Hulandes desplega na Aruba por wordo admiti legalmente (van rechtswege) na Aruba. Ademas Aruba mester percura pa dentro di e margen di e Protocol revista di Recherche Samenwerking y bou di autoridad local, percura pa bira posibel pa Recherche Samenwerkings Team (RST) di Hulanda prome cu 15 di December 2020 haya e autorizacion pa por haci nan propio investigacion. Aruba lo percura tambe pa prome cu 15 di December 2020, bira posibel pa RST, Warda Costa, Koninklijke Marechausee y Landsrecherche por haci nan investigacion criminal independientemente.  Pues nan por haci nan trabou, los di polis. 

ENSEÑANSA 

Ademas un grupo di experto di Hulanda y Aruba (cu eventual asistencia di Corsou y St Maarten), mester entrega nan rapport riba e calidad di enseñansa di Aruba. Esaki ta e resultado di e investigacion interno riba entre otro e calidad di enseñansa, e forma di duna les, e material, e connecion entre enseñansa y e mercado laboral.