Trabounan canando pa construccion Bahia Principe cuminsa maart

ORANJESTAD – Trabounan ta canando pa keda cla pa na fin di maart, construccion por cuminsa pa e hotel Bahia Principe na San Nicolas. Segun e mandatario di turismo Otmar Oduber a splica NoticiaCla.com e siman aki, semper e fecha di inicio tabata fin di maart y no februari (‘manera oposicion ta bisa’). Entre e trabounan cu ta tumando lugar, tin e rapportnan di medio ambiente, asunto di tereno pa keda cla cu cierto traspaso di tereno y tur esaki ta canando su caminda. “E doñonan ta sigui riba e plan y nos ta premira cu pa e tempo menciona, e construccion lo cuminsa”.

Tabata aña pasa na october cu durante un ceremonia na San Nicolas, e doñonan di e cadena hotelero Spaño hunto cu gobierno di Aruba a firma un MOU, cu intencion pa e cadena di hotel cuminsa na Aruba tambe. For di eynan a anuncia e fecha di comienso di e aña aki pa inicia e construccion y pa october di 2016 e habri su portanan caba. E hotel lo bin na altura di Sero Colorado.