Reservanan internacional di divisa di BCA ta cubri 10 luna di pago di cuenta coriente

ORANJESTAD - Riba 8 di oktober 2020, e Comite di Maneho Monetario (CMM1 di Banco Central di Aruba (BCA) a dicidi pa mantene e porcentahe actual di e tasa di e “reserve requirement” (reserva rekeri) na 7,0 porciento. E tasa di e reserva rekeri ta e cantidad minimo di reserva cu banconan comercial mester mantene na BCA y ta igual na 7,0 porciento di nan obligacionnan cu ta vence den menos di 2 an?a. E CMM a considera e siguiente informacion y analisis pa yega na e decision aki. 

Reservanan internacional 

E reservanan internacional (incluyendo e diferencia di revaluacion) a aumenta cu Afl. 338,6 miyon te cu 4 di september 2020, compara cu fin di december 2019. E aumento aki tabata debi na fiansa ricibi for di exterior, bahada den importacion, revaluacion di e reserva di oro di BCA causa pa subida den prijs di oro riba mercado internacional y medidanan di divisa tuma door di BCA. Alabes reservanan oficial di divisa a nota un subida di Afl. 400,8 miyon. Consecuentemente, e reservanan oficial y e reservanan internacional a yega te na, respectivamente, Afl. 2.165,6 miyon y Afl. 2.238,2 miyon riba 4 di september 2020. Di e manera aki e nivel di reservanan ta permanece adecua ora di midinan na e nivel critico di 3 luna di pago di cuenta coriente di balansa di pago, manera produci door di BCA y na e metrico di IMF, esta ARA2 (grafico 1). Abase di e midinan aki, na final di augustus 2020 e reservanan internacional ta cubri 10,6 luna di pago di cuenta coriente, mientras cu e nivel di reservanan oficial a yega 104,4 porciento di ARA. 

1 E CMM a ser institui na mei 2010 pa periodicamente evalua y determina e maneho monetario di BCA. Adicionalmente, CMM ta aspira pa mehora e transparencia di maneho monetario.2E metrico di IMF ARA ta referi na “Assessing Reserve Adequacy Metric” di Fondo Monetario Internacional cual ta midi con adecua e reservanan oficial ta door di compara esaki cu un averahe a base di peso di placa den circulacion, fiansa entre companianan liga na otro, debe riba termino cortico y termino largo, y exportacion di bienes y servicio. 

Grafico 1 - Reservanan 

Desaroyonan den credito 

Den augustus 2020, credito total a baha cu Afl. 12,3 million of 0,3 porciento compara cu fin di 2019. E caida aki tabata relaciona na un bahada den e componente bono di gobierno (-13,8 porciento), cu ta wordo registra den e categoria “otro”. E bahada aki tabata causa door cu bono di gobierno na banconan comercial a vence. E componente fiansa na individuonan, contrario na esaki, a expande (+1,6 porciento) pa motibo di e aumento (+2,7 porciento) den credito pa hipoteca di cas. Pa e periodo ey tambe, e crecemento den fiansa na empresa (+0,9 porciento) tabata efecto di un aumento den fiansa di credito mas largo cu 2 an?a y hipoteca comercial. 

Inflacion 

Inflacion, basa riba CPI, tabata 0,9 porciento na augustus 2020 compara cu e mesun luna di e an?a anterior (Grafico 2). Esaki tabata primeramente causa pa e componente ‘recreacion y cultura’. E promedio di inflacion di 12 luna a baha te na 3,0 porciento na augustus 2020, compara cu e nivel halto di 4,6 porciento cu el a yega na februari y maart 2020. E deceleracion den e promedio di inflacion di 12 luna ta debi na e contribucion mas chikito di e componente di cuminda y energia. E expectativa ta cu e promedio di inflacion di 12 luna lo sigui baha den e resto di an?a, debi na un reduccion den tarifa di coriente desde 1 di januari 2020, asumiendo un prijs mas abou y stabil di crudo y ningun aumento den impuesto. E promedio di inflacion di 12 luna ora exclui e componentenan di energia y cuminda ta 3,0 porciento na augustus 2020. Inflacion ora exclui e componentenan di energia y cuminda tabata igual na e tasa di inflacion general, pa motibo cu e contribucion di e componente di cuminda a mitiga e contribucion di e componente di energia. 

Grafico 2 - Inflacion 

Likides prudencial 

E likides prudencial di banconan comercial (31,8 porciento), cual ta midi e cantidad di activo likido compara cu e total di activo netto total di e banconan comercial, a sigui ampliamente adecua den augustus 2020, compara cu e likides minimo rekeri (15,0 porciento).