Corsou a pasa 15 ora sin coriente den fin di siman atrobe

WILLEMSTAD - Corsou a conoce su di 3 blackout total den un siman di tempo diasabra anochi, cu a dura practicamente 15 ora pa hopi. Te cu diadomingo atardi, ainda no tur caminda na Corsou a haya coriente, y cu esaki, presion di awa tambe a keda afecta debi cu pompnan di awa cu ta traha riba coriente, no a funciona. Segun e director Darick Jonis diadomingo mainta laat, 50% di Corsou tabatin coriente bek. Pa 1'or esaki a bira 75%. A sigura cu ta trahando cu mas di 80 persona riba pia pa reestablece e coriente y cu ta trahando cu parternan rond mundo (a menciona Hulanda, Merca y Canada) pa yuda nan den e situacion. No tabata conoci kico e problema tabata y a pidi masha despensa pa e inconveniencia grandi aki. Mes momento a bisa cu entrante dialuna, por cuminsa 'claim' aparatonan electrico cu por a daña of sufri daño a consecuencia di e apagon cu a surgi ultimo aki. A alerta si cu tin experto riba e tereno, cu por identifica si e claim ta uno 'falso' of cu no a sosode a consecuencia di e apagon. Tabata dialuna mainta cu pa mas di 8 ora, Corsou a 'conoce' su prome blackout di e siman, sigui pa diahuebs pa 4 ora, y despues diasabra anochi pa 15 ora. Diabierna tabatin un brown out, unda cu 40% di e isla no tabatin coriente den oranan di anochi. Segun Jonis, debi na un situacion na Banda Bou, for di diabierna tin hende cu no tabatin coriente of unda cu esaki tabata bay bin constantemente.