Aruba a forma parti di operacion internacional di Interpol contra traficacion di hende

MOSCU/ORANJESTAD - Aruba tabata parti di un operacion internacional di e  Organizacion Internacional di Policía Criminal (Interpol) recientemente unda cu mas di 200 persona a keda deteni den un mega operacion contra trafico ilicito di migrante. Asina INTERPOL a raporta diabierna segun e portal El Pais, di Costa Rica. Fuera di e detencionan, a identifica 3.500 migrante ilegal den e paisnan cu a participa. E operacion tabata conoci como Turquesa II, unda cu a realisa mas di 50 mil control riba e base di data di Interpol, den coordinacion cu e polis federal di Brazil . E operacion masivo a tuma lugar entre 27 di november pa 3 di december den paisnan manera  Antigua y Barbuda, Argentina, Aruba, Bangladesh, Bolivia, Brasil, Canada, Chile, Colombia, Costa Rica, Corsou, Spaña, Merca, Ecuador, El Salvador, Guatemala, Haiti, Honduras, Marruecos, Mexico, Nicaragua, Pakistan, Panama, Paraguay, Peru, Portugal, Republica Dominicana, Senegal, Trinidad y Tobago, Uruguay, Venezuela y Vietnam.A logra rescata como 100 victima na Brazil, Chile, Republica Dominicana, El Salvador, Spaña y Uruguay. segun Interpol. Tambe a detene 30 persona relaciona cu e exploitacion sexual di muher migrante.