Detencion lo cay den termino corto den caso di dama policial viola

ORANJESTAD – Dentro di poco por spera detencion den caso di e dama polis cu lo a wordo viola algun tempo pasa. Esaki a keda confirma pa Ministerio Publico. “Esaki lo sosode a termino corto” vocero di Ministerio Publico Ann Angela a confirma na NoticiaCla.com awe mainta. Fuera di e informacion ey, Ministerio Publico no kier bisa mucho cos, mirando e delicadesa di e caso aki. Ora cu a puntra si ta trata di mas di un detencion, e contesta tabata 'Aanhoudingen' pues mas cu un persona. NoticiaCla.com a compronde di otro fuente cu ta trata di personanan conoci den comunidad, y como tal mester trata e situacion aki cu sumo cautela. Pero Ministerio Publico no por a confirma esaki awe mainta. Manera ta conoci algun siman pasa un dama agente policial a haye den un situacion unda cu for di su informacion a saca afo cu hendenan lo a viole y lague benta un caminda. E hecho cu e dama, di profession ta un agente policial, a pone cu e caso a hala mas hopi atencion.