E spirito Arubiano Shariska Winterdal a completa su Double Iron Woman Event!

MALMOK - Casi 44 ora despues di a inicia e hazaña deportivo mas grandi di su carera, atleta local Shariska Winterdal (43) a logra cumpli cu su meta diadomingo mainta algo prome cu 10'or. E asina yama Double Iron Woman Event, como e Spirito Rubiano, Shariska a sa di landa 8 km, (algo mas), core 360 km riba bicicleta, y core 84 (algo mas) km, poniendo asina un record local riba su nomber di coremento y tambe personal. Acompaña pa e ekipo di coredo Viper Aruba, el a yega bou di aplause bek pa su 'base' na Arashi, unda cu 43 ora prome (diabierna atardi 3'or) e la drenta laman pa inicia su hazaña. Noticiacla a papia cu ne diasabra y a cubri parti di su coremento diadomingo mainta trempan, ora cu e tabata falta 'apenas' 12 km pa core ainda. E meta principal tabata pa recauda fondo pa e fundacion Frank Polanco cu ta sostene mucha huerfano di Aruba. Alavez el a haci esaki como sosten na su mama cu ta sufriendo di kebrante di salud na Hulanda. Noticiacla kier a felicita Shariska cu e logro inmenso personal aki!. 

E PROGRAMA

Manera programa, den careda di 3'or na Arashi diabierna atardi, e 'Spirito Arubiano' manera e ta wordo yama pa e hazaña aki, Shariska Winterdal a drenta laman pa inicia su 'Double Ironwoman' event cubriendo 396-kilometer den 3 dia, cu lo a dura te cu diadomingo. Durante e proximo dianan, Shariska mester a completa un circuito di landamento (8km), core bicicleta (360km) y core un trayecto riba Aruba (28km) pa completa su meta. El a premira cu den careda di diadomingo mainta entre 6'or pa 7'or esaki lo a keda cla, pero esaki a bira algo mas despues.