Santa Barbara Resort ta bira Sandals Curacao

WILLEMSTAD - Sandals, e doño nobo di Santa Barbara Resort na Corsou, ta bisa cu nan ta spera cu den e prome aña nan lo inverti 40 miyon dollar cu tur resultado positivo pa economia y trabou. Asina e matutino Antilliaans Dagblad (AD) ta raporta. Mester menciona tambe cu e matutino AD ta e prome cu a raporta di e noticia positivo aki for di comienso di luna aki. E raportahe actual den AD ta papia di cu Sandals tin pensa di genera 1.200 cupo di trabou. E anuncio internacional a tuma lugar e siman aki unda cu Sandals Resorts International (SRI), a informa e noticia. E compania ta e lider di companianan all-inclusive y ya a firma e acuerdo caba. E hotel lo yama Sandals Curacao y ta bira e di 16 resort luhoso di e cadena y e di 10 isla cu e ta ubica. Segun e propietario y presidente di SRI Gordon ‘Butch’ Stewart, hunto cu su yiu Adam tabata un placer di por a sinta hunto cu gobierno di e isla y famia Smeets cu ta propietario di Santa Barbara, pa e hazaña aki. Segun Smeets, esaki ta un oportunidad unico pa trece un cadena hotelero renombra pa Corsou. Segun Smeets, SRI ta den alcance pa trece aerolineanan Mericano pa Corsou y incorpora e isla den su itinerario regular.  Sandals Corsou awor ta dispone di 350 camber y suites luhoso, pero tin plan pa sigui expande e tereno di 3 mil hectarea. Den 2021 lo cuminsa un renobacion segun norma di Sandals.  Fuente: Antilliaans Dagblad. Potret cortesia Jamaican Observer.