Otmar Oduber a presenta pruebanan contra acusacion di Jan de Ruijter awe

ORANJESTAD – Manera cu NoticiaCla.com a raporta ayera caba, minister Otmar Oduber a entrega keho di calumnia contra ciudadano Jan de Ruijter siman pasa . Mientrastanto Oduber a splica NoticiaCla.com awe mainta, e keho entrega ta mas bien pa contra aresta e keho cu de Ruijter a entrega contra dje, pasobra e keho ey ta contene pruebanan ‘falso’. Como tal e ta considera cu de Ruijter a comete algo illegal door di entrega di e keho ey. Oduber a pidi pa Ministerio Publico cuminsa un investigacion penal contra dje. Ministerio Publico awe mainta a confirma na NoticiaCla.com cu Oduber a haci tal entrega.” Sr Oduber a wordo informa cu OM lo analisa e situacion y cu e lo wordo invita pa un cita pa trata su puntonan cu e la entrega” vocero di Ministerio Publico, Ann Angela a sigura NoticiaCla.com.(lesa e keho aki)

APELACION DI VEREDICTO

Awe mainta tambe, Odubera dicidi di presenta tur prueba pendiente cu e tin contra de Ruijter riba varios tereno. Entre nan, prueba cu e la apela e veredicto contra dje di aña pasa . E documentonan ta mustra cu for di 24 di november 2014, su abogado Chris Lejuez a haci e entrega di e apelacion, hunto cu e ‘memorie van grieven’. Cu esaki e ta mustra cu loke cu de Ruijter ta bisa di cu Oduber nunca no a apela e sentencia, tambe no ta cuadra.(lesa e apelacion aki)

DEPOSITO DI SUMA DI GARANTIA

E ta sigui cu e otro acusacion di de Ruijter, cu gobierno no a logra cobra e suma di garantia di 2 miyon dollar di e proyecto hotelero di Hard Rock Hotel. Segun de Ruijter, e suma no ta colecta, pero Oduber a mustra documentonan awe cu ta bisa otro. E prome ta un documento di e banco concerni (Aruba Investment Bank) , cu ta mustra cu e banco ta confirma cu nan a deposita e suma di 2 miyon dollar riba cuenta di gobierno. Un otro documento cu Oduber a presenta, ta mustra cu na su turno, tesorero di departamento di finanzas ta confirma di a ricibi e suma di 2 miyon dollar riba un fecha specifico.(lesa e deposito aki)

LISENCIA PA CASINO

Y finalmente, e mandatario ta mustra documento cu ta mustra cu, contrario na acusacionnan cu ta e lo ta esun cu lo a ricibi suma di 1 miyon dollar pa a otorga permiso pa un permiso di casino pa La Cabana, esaki no ta berdad. E documentonan presenta awe mainta, ta mustra cu pa cuminsa, no ta durante e gobernacion cu Oduber ta parti di dje, e permiso a wordo duna. Ta trata di gobernacion anterior di MEP, unda cu ex minister di husticia Rudy Croes a duna e permiso. “Laga Evelyn (Wever Croes) bay puntra Mo Rudy ken a haya e 1 miyon florin pasobra ta e ta esun cu a duna e permiso”, Oduber a sigura awe mainta.(lesa e licensia aki)

OTRO CASO CONTRA DE RUIJTER

Y finalmente, Oduber a confirma cu e la entama un otro caso sumario contra de Ruijter, basa riba otro acusacionnan no corecto pa cual e kier pa de Ruijter rectifica y para pa su palabranan. Segun Oduber, de Ruijter ta un drogadicto, y un persona cu mester di un analisis mental, y cu e no ta bon di cabez. Y loke mas ta irita Oduber, ta cu tur e puntonan cu de Ruijter ta trece dilanti, e no tin prueba pa para ariba y substancia e acusacionnan. No ta conoci ki dia e caso aki lo tuma lugar.