Entrante Januari otro aña Venezolanonan mester visa pa drenta Aruba

ORANJESTAD – Na comienso di otro aña, Venezolanonan cu kier bin Aruba (unabez cu habri frontera bek), lo mester aplica pa un visa pa por drenta nos isla. For di fuentenan fedefigno, e portal aki a compronde cu ya caba tur cos ta cla caba, y cu ya Hulanda a inicia e proceso diplomatico cu e pais en cuestion, y cu pa dia 15 di januari 2021, e regla nobo aki ta drenta na vigor. Localmente prome minister di Aruba Evelyn Wever por a bisa solamente cu e intencion ta tentativamente dia 15 di januari otro aña enberdad, pero tur cos ta depende di Hulanda. Pero for di e fuentenan di e portal aki, ya e documentacion ta regla entre Hulanda y Venezuela na nivel diplomatico. For di Consulado di Venezuela na Aruba no por a haya nada debi cu e Consul no ta na Aruba y esnan encarga no ta autorisa pa papia.