CFT: Gobierno di Aruba tin te 1 februari pa presenta lista nobo di medida

ORANJESTAD - Mirando cu e medidanan tuma y e splicacion adhunto den presupuesto 21015 ta practicamente mescos na esunnan di e presupuesto adapta di 2015, CFT ta haya su mes pa ripiti su punto di bista cu, ainda no a tuma suficiente medida. Esaki ta saca saca for di e rapport di CFT riba e concepto di presupuesto 2015. Basa riba esey, CFT ta recomenda cu gobierno tin te 1 di februari pa presenta un plan elabora cu un splicacion financiero adhunto, basa riba e cantidad di medidanan. Fuera di esey, gobierno di Aruba mester raporta cada cuartal cu un resumen di loke a sosode, kico e avance ta, di tanto e gastonan como entrada. Esaki mester wordo haci di un forma perspicaz, riba e nivel minimal di categorianan economico y reparti na e ministerionan. Ta bai sin mas pa bisa cu por haci esaki basa riba e avansa di e 24 medidanan ‘concreto’ cu gobierno di Aruba mes a propone. Basa riba e informacion di e raportahe di cuartal, y acopla na e plan di paso, basa riba e.o. e 24 medidanan sugeri, por husga e ora te na ki punto e presupuesto (2015) ta realistico y si e medidanan sugeri, a wordo implementa y si e tin e efecto presupuestario desea.

SITUACION FINANCIERO

Importante tambe ta e hecho cu segun informacion di e presupuesto, ta papia di cu mester presta placa atrobe riba tereno internacional. Y como tal, si kier haci esaki, e tin cu tuma lugar cu aprobacion di Conseho di Minister di Reino. Y pa nan aproba, nan tin cu haya conseho di CFT. Y pa CFT aproba esaki y duna conseho positivo, gobierno di Aruba mester tene nan mes na e recomendacionan sugeri. 

Den e presupuesto 2015, segun CFT, ta bolbe mustra cu e maneho financiero di Aruba no ta den orden. No por saca un coneccion entre e cifranan di añanan y e splicacion di esaki, of por lo menos e ta dificil pa haci esaki. Banda di esaki, no ta mucho cla kico a wordo hiba den e caminda basico, y e desaroyo autonomo di esaki. Pasonan mucho ‘bunita y perfecto’ riba tereno di p.e. e categoria mas grandi di gasto cu ta personal, ta pone cu e no ta cuadra cu e meta real di un reduccion di deficit riba cual e pakete di medida ta basa su mes ariba, pa por logra tin e surplus presupuestario na 2018.