NV Elmar ta anfrition di conferencia regional CARILEC

ORANJESTAD -  Nos compania nacional di distribucion di coriente, N.V. ELMAR ta anfitrion di e conferencia regional pa ingenieronan y companianan cu un specialisacion riba e tereno di electricidad, cu ta tuma luga for di dia 27 pa dia 30 di juli proximo. E conferencia ta organisa pa CARILEC, cu ta e organisacion di companianan di electricidad di e region Caribense, pa atende retonan cu e companianan den e region ta confronta cune, pa discuti entre otro riba tema di innovacion y sostenibilidad. Tur e islanan di Caribe Hulandes tambe ta miembro di CARILEC.

Director di N.V. ELMAR, Ing. Robert Henriquez ta invita ingenieronan y companianan cu ta activo riba e tereno di electricidad pa haci uzo di e oportunidad y registra pa participa na e conferencia cu e tema “Unlock the grid”, cu expertonan renombra internacionalmente. E oportunidadnan cu e conferencia ta presenta pa nos profesionalnan local ta multiple. Pasobra e ta tuma luga na Aruba mes, e ta ofrece e oportunidad pa mas hende local por atende cu mas facilidad y cu un impacto mas chikito riba e continuidad di nan trabao y sin e necesidad di tin cu biaha. E factor aki ta algo cu ta hopi beneficioso pa tur compania local, grandi y chikito.

Ing. Robert Henriquez ta subraya e oportunidadnan riba tereno di desaroyo y conocemento. Ademas e conferencia aki sigur tin un balor añadi pa companianan cu kier busca partnernan den nos region y/of kier expande cu nan mesun producto of servicio den Caribe, pa nan establece un relacion cu e personanan cu ta hunga un rol importante den e mundo di utilidad den nos region. E director di N.V. ELMAR ta splica cu tin hopi profesionalnan registra pa bin, e agenda ta hopi bon y hopi diversifica. Diadomingo, dia 27 di juli lo tin un “webcast” cu dos orador mundialmente conoci, den persona di Condoleeza Rice y Jack Walsh.

Ta prome biaha cu N.V. ELMAR ta anfitrion di un conferencia di e magnitud aki y e ta un honor pa ta parti di e organisacion di un conferencia asina importante, segun Ing. Robert Henriquez. Participantenan por spera di tende hopi riba generacion di coriente, distribucion di coriente, tecnologia nobo, innovacion y tur loke tin di haci cu e parti sostenibel, tur e topiconan hopi discuti e ultimo añanan aki. Pa mas informacion y registracion pa e conferencia, bishita e website www.carilec.org of tuma contacto cu Alison Pascal via di email apascal@carilec.org.