No ta prome biaha cu Quanten LLC ta purba inverti na Aruba

ORANJESTAD – No ta prome biaha cu e compania Quanten LLC ta purba inicia actividad comercial na Aruba. Noticiacla.com a compronde cu na 2012 caba, e compania a haci intento cu e gobierno di turno (Gabinete Mike Eman 1) pa asina purba un proyecto di panel solar e tempo ey, pero no refineria. Y tampoco e tabata den forma di un concorcio manera awor. Pero e gobierno di e tempo ey a rechasa e peticion, debi cu e compania en cuestion ‘no por a presenta nada concreto’ segun informacion cu e portal aki a ricibi riba e tema ey. Despues nan (e compania)  a purba na Corsou na 2015 pa un proyecto di panel solar, y aki tampoco a logra. Awor nan ta uni cu un grupo di otro compania (consorcio) pa purba ‘atrobe’, y e biaha aki pa e proyecto di rehabilitacion di refineria. 

E LIÑA DI TEMPO

Pa loke ta e compania, si sigui e liña di tempo, por mira cu e compania Quantum a duna oido na e anuncio di gobierno di Aruba dia 8 di juni ultimo ora cu a habri e oportunidad pa e proyecto di rehabilitacion di e refineria den dos trayecto REOI-1 a pidi interesadonan pa expresa nan interes den reapertura di refineria of industria relaciona cu refineria y energia, por ehempel LNG, facilidadnan petroquimico, energia alternativo. Mientras cu REOI-2 a pidi interesadonan pa expresa nan interes den cualkier otro tipo di desaroyo (“vervangende industrie”), cu ta genera cupo di empleo y desaroyo economico similar na e refineria. Segun nos investigacion, y basa riba informacion awor tambe, ta mira cu e compania Quanten ya a lanta e consorcio na Merca (estado di Texas) dia 1 di juli 2020, titula Quanten Consortium Aruba LLC. Ora cu check e adres di e facilidad, e ta mustra cu ta un adres den un zona residencial, pues no ubica den un establecimento comercial. Esaki no ta un problema necesariamente, pero por mira cu for di e momento ey, e compania a cuminsa forma, durante e periodo di investigacion. Despues di esaki, tabata fin di juli (31) di e aña aki cu gobierno di Aruba via RdA a divulga e progreso di e buskeda pa companianan potencial, y a resulta cu 57 compania a registra pa e parti 1, di cual 38 a haci nan ‘due diligence’ y 29 a sigui pa dilanti cu nan oferta. Si tuma nota di e informacion recien, por saca afo cu obviamente Quanten LLC, of den e caso aki Quanten Consortium LLC tabata parti di e grupo pre selecta aki. Loke ta remarcable, ta cu diripiente ta bin e retiro di e director di hunta di directiva di RdA, esta Richard Eman, cu a duna sinembargo como motibo ‘rason personal’. Gobierno a sali afo bisa mesora cu ta algo normal ya cu el a logra su meta pa cu RdA y lo keda awor envolvi cu Utilities so. Hopi ta pensa sinembargo cu e retiro tin di haber cu e escogencia pa cu e consortio aki, cu a keda anuncia e siman aki. 

SCEPTICO

Manera cu e portal aki a raporta anteriormente caba, for di momento cu e noticia a keda anuncia di ken e companianan ta cu lo negosha cu ne mas serio awor den e fase aki, e comentarionan no tabata mucho positivo for di gremionan comercial. Primordialmente esun di e consortio, compara cu esun di LGN (pa e parti di REOI-2) pa cual e compania EAGLE LGN a keda scogi cu si ta ‘mustra’ mas profesional y creibel compara cu Quanten LLC, aunke cu hopi mas no sa tampoco di e ultimo aki esta Eagle LNG