Prensa a cera conoci cu e bistro Chines renombra P.F.Chang’s

(ADVERTORIAL)

ORANJESTAD – Prensa local diamars merdia a haya e oportunidad pa purba e cuminda di e bistro Chines mundialmente renombra P.F.Chang’s situa den Gloria Entertainment Complex. E restaurant ta habri su portanan e siman aki pa publico. E bistro a reserva 3 ora dedica pa prensa, unda cu pa medio di un menu special hinca den otro cu ta resalta tur e specialidadnan di e restaurant, prensa local a haya un bon indicacion di kico por spera di e experiencia unico aki. “Nos tabata busca un strong brand cu ta conoci pa turista y local” tabata e motibo duna pa Eduardo de Veer, di MetaCorp cu ta doño di e compleho completo, na Noticiacla, pakico a scoge pa P.F. Chang’s. 

DETAYES

E personal completo ta local, pero entrena pa un ekipo di 5 cu a bin for di Merca, pa haci e trabou durante 3 pa 4 siman. Segun e chef principal di e cadena, Rigo Rubalcava a splica e portal aki, ta su trabou pa biaha pa tur apertura mundial y entrena e personal local pa sigura cu e calidad ta di e nivel di P.F. Chang’s. E clientela internacional mester por ta sigur cu na cada P.F. Chang's, nan por conta cu e calidad mundial. E chef principal Rigo Rubalcava mes ta na Aruba pa hunto cu un ekipo di 4 pa 5 persona di ‘headquarters’, percura pa e calidad di cuminda ta riba nivel di P.F.Chang’s. Prensa di Aruba a purba e menu diamars merdia, pa nan mes sinti e experiencia completo di come na P.F. Chang’s. E periodo di entrenamiento mes ta dura 3 siman, y despues ta wak e detayenan chikito na final. Ora cu sinti cu e personal ta cla, ta sigui pa e siguiente localidad. Fuera di e chef, ta bin dos persona pa e bar, y tambe pa cushina y un persona di relacionan publico cu ta atende cu e publico durante nan estadia. Rubalcava mes ta un legendario di e compania. Esaki pasobra el a inicia cu P.F. Chang’s for di nan comienso na 1993. El a cuminsa na nivel di Pantry, y aworaki e ta e hefe di tur chef mundial y ta biaha rond mundo pa habri e restaurantnan. Te na 2018 tabatin 308 restaurant mundialmente. 

E MENU

E menu tabata uno special traha pa e momento di prensa, unda cu loke a resalta ta e appetizers, specificamente e Chang’s Chicken Lettuce Wraps, cu ta un tipo di carni mula cu ta wordo hinca den un blachi di lechuga, y comi como si fuera ta un taco of un burrito.  Pa loke ta e entrada, loke a resalta ta nan mundialmente conoci ‘Mongolian Beef’, y e Singapoer Street Noodles, y nan Chang’s Spicy Chicken. Aunke pica, e chef a splica cu por haci tur cos na gusto di e cliente. Tur cuminda ta wordo prepara fresco, y cu un calidad superior pa tur hende haya lo maximo. Loke ta interesante ta cu ta mantene e cuminda simple, pa no perde e smaak, envez di añadi un cantidad di ingrediente. E lugar ta carga 85 persona paden y 160 pafo, usando standard di COVID19. 

HISTORIA

P.F. Chang’s China Bistro ta un cadena di restaurant basa na Merca, cu a keda funda na 1993 pa Paul Fleming y Philip Chiang. A incorpora e nomber di e socionan (P)aul (F)leming y Philip Ch(i)ang(‘s) y a yame P.F. Chang’s. Te cu 2018, nan tabatin 305 restaurant rond mundo. Otro aña na maart ta habri uno na Ecuador y na Mei na India.