Corsou ta bek bou codigo oraño debi na aumento di casonan COVID19

DEN HAAG – Debi na e aumento di casonan di COVID19 na Corsou, Hulanda a impone e codigo di color oraño bek pa Corsou diamars. “Esaki debi na e aumento di chens pa un contagio di e virus”, ta loke e portal di Hulanda ta bisa riba e tema. Esaki kier men cu Hulanda ta permiti solamente biahenan ‘esencial’, cu por traduci den biahe di emergencia, medico of pa negoshi urgente. RIVM no ta haya sinembargo cu un persona cu ta na Corsou caba, mester bolbe Hulanda mesora. 

CONSECUENCIA

Como un di e consecuencianan, un biahero cu yega Hulanda bek for di Corsou, mester bay den cuarentena casero pa 10 dia. Tambe ta conoci cu unabez cu bo biaha di Hulanda pa un pais cu ta marca ‘oraño’, tur seguro di biahe ta cancela, pues no tin seguro pa e persona aki. 

EFECTO CORSOU

Contrario na Aruba, e consecuencia comercial pa Corsou por ta devastador. Esaki pasobra Hulanda (Europa) ta e mercado principal di turismo pa e isla. Y consecuentemente esaki kier men cu hotel y e industria completo di turismo lo sufri grandemente, net den temporada di fiesta. Vacacionan lo por wordo cancela na grandi, cu ta nifica menos bishitante, menos cliente, menos entrada, cu finalmente por nifica ciere di negoshi. Asina entre otro minister di Economia Steve Martina a bisa durante un conferencia di prensa diamars mainta. Ta e tarea awor pa percura pa mas lihe posibel cambia e codigo bek, y percura pa negoshinan no sufri. Pasobra mientras cu un negoshi por cera temporalmente, ta hopi mas dificil pa e habri bek.