Skepticismo riba futuro di refineria den man di companianan nobo menciona

ORANJESTAD – Desde cu gobierno (lesa: Prome Minister Evelyn Wever Croes) a anuncia nomber di e dos companianan cu ta interesa y a keda ‘escogi’ pa sigui negosha pa reapertura di nos refineria, esaki a genera un ola di reaccion y no necesariamente positivo. Por lo menos entre esnan cu a comparti nan pensamento cu e portal aki. Mientras cu di parti di politica, (sigur di coalicion) comprendiblemente a mustra nan grado optimismo cu e ‘logro inicial’ aki,- aunke cu experiencia a siña nan ta ‘cauteloso’ ainda te ora cu cos ta completa- otronan ta menos ‘positivo’. Sigur di banda comercial, hopi ta critico. Mas bien no pa e loke ta conoci, sino e loke no ta conoci (ainda). Preguntanan manera ken ta tras di e consortio aki, e nombernan di esnan envolvi y mas importante, nan ‘track record’. Y no obstante cu representantenan di Refineria di Aruba (RdA) a duna un splicacion di e ‘background’ di cada un di e dos companianan durante nan presentacion den Parlamento, esaki parce di no ta ‘suficiente’.

KEN TA QUANTEN LCC

No obstante e informacion suministra den Parlamento riba  Consortio Quanten LCC y Eagle LGN door di representantenan di RdA, hopi hende a dicidi di bay haci nan propio investigacion usando e manera mas facil (google) y a saca nan conclusionnan. Parti di e desconfianza inicial ta debi cu pa motibo di e asina yama ‘NDA’ (Non Disclosure Agreement) cu ta prohibi gobierno di revela mucho detaye di e compania y personanan pa motibonan di privacidad comercial, tin hopi informacion cu no por sali afo (ainda), pero cu mes momento ta motibo pa e ‘duda’ aki den hopi cu a comenta pa e portal aki. 

PORTAL QUANTEN

Un di e formanan mas facil pa investigan (no necesariamente esun mas confiable si), ta pa bay riba e portal di p.e. Quanten LLC. Pa algun, e informacion eyriba a crea aun mas pregunta segun un grupo di persona. Pa cuminsa, ta aparece potret di tres persona cu ta encarga cu e compania, di cual uno ta conoci pa Aruba caba, esta Karl Welch. E ta conoci pa ta parti di e organisacion cu a organisa concierto di Sinbad. Mientras cu no mester saca conclusion sin mas, ta logico si cu hopi ta cuestiona kico e experticio di Karl Welch por ta riba e tereno di energia y con serio mester tuma esaki. Hopi ta wak e solamente como organizador di concierto y nada mas. Fuera di e parti ey, a señala varios error gramatical riba e portal, cu ta pone cu ta cuestiona e seriedad di e compania. Si un compania cu ta cla pa por medio di un consorcio, kier y por inverti 3 biyon dollar na Aruba, con bin no por produci ni un portal drechi cu eror gramatical ariba. (E portal aki (noticiacla) riba prome bista, tambe a mira e puntonan menciona (di e portal Quanten) y tambe e fayonan gramatical en cuestion, pero ta den su propio proceso di investigacion riba e compania(nan). Keda pendiente pa esaki.)

CABAY DI ELECCION 

Loke hopi ta cuestiona, ta e facilidad cu cual e consorcio kier inverti 3 biyon dollar y genera trabou pa 2000 hende, mei mei di un asina yama crisis mundial unda cu a mustra cu ta dificil pa haya hende pa opera refineria y/of cu un refineria manera cu e mester opera, no ta sea rendable of lucrativo mas. Ta mustra cu esaki ta meramente un cabay di campaña pa e gobierno na mando, pa genera hopi voto. Otronan ta mustra cu e compania aki ta parce uno cu no tin un bon track record, refiriendo na pasado unda cu a priminti Corsou pa un parke solar pero esaki nunca no a bin manera priminti. Pues yen di promesa pero nada di cumplimento. Esey ta pone hopi cu duda cu esaki por bira un tipo di CITGO #2. Un promesa cu despues ta resulta di ta nada concreto. 

CABAY DI CAMPAÑA

Tabata apenas un siman pasa cu e portal aki a entrevista prome minister Evelyn Wever Croes. Un di e preguntanan clave tabata netamente riba e tereno aki. Refineria. Esta “Di con nos mester kere cu apertura di refineria no ta un fata morgana? (Cada eleccion e ta ‘factibel’ te ora gobierno sinta)’. Riba esaki e mandatario a sigura e portal aki cu e ta hopi cauteloso y cu MEP lo no usa posibel reapertura di refineria como un ‘cabay di campaña’ y a haya un no rotundo riba e pregunta aki. 

REACCION PROME MINISTER

Mientrastanto a acerca e prome minister di Aruba riba e reaccionnan ricibi den comunidad pa cu e noticia di e reapertura di e refineria. E ta contento cu tin asina hopi hende critico.”Ami tambe ta critico, y mi tambe ta cauteloso. Esey mi a bisa siman pasa y awe atrobe” e mandatario a cuminsa na bisa. Segun e mandatario, el a institui un comision di expertonan y e ta confia den nan conseho.  “Worst thing that can happen is cu nos no ta haya operador y mester desmantela. Best thing that can happen is cu nos ta haya un operador y trece progreso den nos pais” e mandatario a sigui bisa. Pa loke ta e credibilidad di e compania, e mandatario a bisa esaki:”  Ami si tin confiansa den nos profesionalnan, y e backup cu gobierno Mericano a duna e consorcio Quanten, ta dunami mas comfort cu e backup cu gobierno Venezolano a duna Citgo na 2016”. Y finalmente, e hecho cu a bay Parlamento y duna informacion, tambe a wordo critica di cierto forma.” Mi ta djis purbando di hasi politica diferente, mas transparente. Hendenan no ta custuma cu esey” e mandatario a finaliza bisando.