Consorcio Quanten LLC y Eagle LNG scogi pa opera refineria di Aruba

ORANJESTAD – E consorcio Quanten Aruba Consortium Limited Liability Company (LLC) y Eagle LNG a keda scogi pa Aruba pa opera tanto e refineria na San Nicolas como e otro negoshi manera di LNG. Asina prome minister Evelyn Wever Croes a informa Parlamento di Aruba dialuna atardi den un session publico. Ambos ta cla pa cuminsa cu nan trabou na 2021 y lo inverti un suma cuantioso (3.5 biyon y 185 miyon dollar respectivamente) y genera basta empleo (2000 y 100 cupo di trabou respectivamente). E informacion aki no kier men cu nan ta operadornan definitivo, sino cu awor ta bay cuminsa negosha cu e dos companianan unda cu tin cu bay cera un MOU (Memorandum Of Understanding) y despues un letter of intent, pa asina detaya tur cos cu mester bin y pa despues numa firma e acuerdo final. Ambos compania lo cuminsa negosha e terminonan awor cu Aruba y haci nan asina yama ‘investigacion operacional’, pa saca afo kico tur por y no por finalmente. Si na final no logra toch cu esaki (corda kico a pasa cu CITGO cu finalmente no a keda cla pa opera), prome minister Evelyn Wever a sigura cu tin un plan B, pero no a bisa kico esaki ta. 

QUANTEN ARUBA CONSORTIUM LLC

E compania Quanten Aruba Consortium LLC lo inverti 3.5 biyon dollar den periodo di 3 aña iniciando na 2021, y lo genera 2000 cupo di trabou durante periodo di construccion. Ta premira cu e rehabilitacion di e proyecto lo keda cla na 2023. E consortium mes ta consisti di tres compania, di cual 2 ta compania cu ta envolvi den industria tecnologico. Un di nan ta un compania cu ta envolvi den proyectonan cu ta den area di comunicacion, manera tecnologia di nivel halto di comunicacion na Merca y otro paisnan pafo di Merca.  E di dos miembro di e consortium ta un compania cu tambe ta den e ramo tecnologico specificamente riba e tereno di renobacion y electrico. Nan tin basta proyecto solar y otro tecnologico cu ta crea energia ariba e tereno renovable. E di tres miembro di e consortium, ta un compania financiero cu tin experiencia den financia e tipo di proyecto cu e otro dos companianan ta ehecuta riba tereno tecnologico. Loke e tres companianan aki a haci, ta busca e sosten di diferente otro compania pa e proyecto specifico aki cu tin e experiencia amplio riba tereno di refineria. 

EAGLE LNG

E compania aki lo inverti un suma di 185 miyon dollar y lo genera 100 cupo di trabou for di 2021 caba, pero no ta conoci ki tempo exacto esaki lo ta. E ta un compania cu su negoshi principal ta distribuiLiquefied Natural Ga (LNG) pa consumidornan. Esaki ta wordo haci di e suministro cu nan tin di nan plantanan na Merca. Y nan ta distribui e LNG pa mercado di nan clientenan y ta buscando mas  mercado pa amplia e distribucion aki y yuda paisnan chikito pa suministra esaki.