Polis a actua riba laman pa evita samenscholing acuatico

ORANJESTAD – Polis den fin di siman no tabata activo solamente riba tera, pero tambe riba laman. Diadomingo p.e. e patruya maritimo mester a para un ‘evento’ acuatico dilanti Ritz Carlton unda cu tabatin varios boto. Sinembargo e fiesta a sigui dilanti Nikki Beach, unda cu polis un biaha mas mester a ‘plama cos’. Mes momento e agentenan policial a informa e capitanan di boto cu si nan no move, lo tuma e botonan den beslag. Por considere un tipo di 'aglomeracion' estilo samenscholing, di un grupo di hende hunto riba varios boto. Mescos cu na tera, a dicidi e ora di actua pa evita e aglomeracion aki, relaciona cu COVID19. A bisa caba den pasado cu e reglanan ta conta tanto riba tera como riba laman. Esey a pone cu e botonan mester a move mesora di e sitio.