Corsou awe tin 1 siman y mei ta raportando riba 100 caso positivo di COVID19 pa dia

WILLEMSTAD – Diadomingo ta cumpli un siman y mei cu Corsou a raporta riba 100 caso pa dia positivo di COVID19. E un dia cu a raporta 88, ta pasobra un laboratorio no a raporta. Awe diadomingo, Corsou a bolbe surpasa 100 caso y a raporta specificamente 125 caso positivo riba un dia pa COVID19. Ademas algun persona mas a keda hospitalisa y di esnan cu a keda hospitalisa, algun a bira mas malo y mester a bay den cuido intensivo. Apenas 9 persona a recupera diadomingo. Otro caso interesante ta cu den fin di siman (diasabra) Corsou a surpasa e total di caso positivo activo cu Aruba a raporta na September ultimo (1603 caso), aunke cu Corsou tin mucho mas habitante. Pues e comparacion por ta no ta comparativo, pero e ta duna un bista si di con hopi caso positivo Corsou a acumula den un tempo hopi cortico. No obstante e diferencia di cantidad di habitante, e situacion ta sigui serio. E medidanan cu a wordo anuncia tin un siman mas pa bay, prome cu dicidi si ta aumenta e medidanan cu tin aworaki.