Sector medico di Aruba a pidi Knops revoca cortamento di 5 miyon den e sector

ORANJESTAD – Den un carta cu noticiacla tin den su poder, un grupo di por lo menos 12 instancia di sector medico di Aruba, a pidi secretario di estado Hulandes Raymond Knops pa revoca e medidanan impone riba sector medico relaciona cu e acuerdo cu Hulanda, y sinta hunto cu e sector pa yega na otro areglo mas husto. Fuera di un carta pa e mandatario, e grupo aki a manda un carta tambe pa e colegio di supervision financiero CAft pa haya tende nan ‘motivacion’ pa nan conseho di mei ultimo cu a conduci na e medidanan cu Hulanda a tuma contra Aruba riba e sector aki. 

KNOPS

Den e carta pa sr Knops, e grupo ta referi na e corespondencia cu CAft riba e mesun tema y ta splica nan preocupacion pa tanto e conseho, como tambe e forma di no kier ‘hustifica’ y ‘motiva’ nan conseho di mei ultimo. E conseho aki a pone cu Hulanda a exigi pa Aruba corta mensualmente den AZV cu 5 miyon florin ‘te proximo aviso’. Segun e grupo cu a manda e carta, nan ta pidi Knops pa ‘revoca e decision’ y sinta na mesa cu nan pa asina yega na un miho areglo’. Nan no ta compronde con CAft ta yega na nan argumento, indicando cu  e sector medico di Aruba ta asina ineficiente cu ta hustifica cortamento di entre 12 pa 13% inmediatamente den e sector. Segun e grupo, nan ta splica e mandatario cu for di momento cu a haci e cortamento, e instancianan aki mester a bay den un ‘survival mode’ pa por a sobrevivi esaki. 

CAFT

E carta pa e presidente di CAft, esta Raymond Gradus tambe ta trata e mesun tema, pero mas specifico unda cu nan ta pidi un contesta mas amplio riba nan carta pa e colegio aki, mientras cu nan a gradici pa e prome carta cu nan (e sector medico )a ricibi. Problema ta cu e contesta cu nan a haya (e sector medico), tabata hopi simple sin ningun hustificacion concreto. Y ta esaki ta loke e grupo aki ta pidiendo di e gremio. Nan ta mustra sr Gradus riba e preocupacion cu nan tin con CAft ta maneha nan forma di ser cu pa e grupo medico, no ta mucho cla. CAft ta laga sa cu no ta nan custumber pa hustifica nan comentarionan y sigur pio na e sector medico. Pero segun e sector medico, CAft no por djis sali afo asina facil sin un splicacion. Y como tal ta pidi un biaha mas pa nan haya un contesta mas concreto, pa asina e sector medico por compronde kico specifico a conduci CAft yega na e medida asina drastico cu ta impacta e sector medico asina severo. Lesa e carta pa Knops AKI y pa CAft AKI.