E siman aki Aruba ta conoci cu Gloria Entertainment Complex

ORANJESTAD – E siman aki Aruba ta conoce un otro compleho di entretenimento grandi, enfoca primordialmente riba e experiencia di pelicula, pero tambe un experiencia culinario y actividad pa mucha. Ta trata di e asina yama ‘Gloria Entertainment Complex’ cu dia 10 di December proximo ta habri su portanan pa Aruba completo. Un inversion inicial di MetaCorp di 25 miyon florin cu finalmente a bira 40 miyon. Cu un total di 10 auditorio di cine y 3 restaurant renombra, e ta priminti di bira e centro nobo di atraccion di Aruba, situa riba Sasakiweg. Cu esaki, famia de Veer di MetaCorp ta cumpli cu nan meta di presenta nan proyecto mas nobo y ta duna honor na esun cu a cuminsa tur cos, Shon Eddy de Veer na 1920. Cien aña despues, Eduardo de Veer y famia ta duna honor na su memoria, door di pone e nomber di Gloria (Aruba su prome cinema cu a habri su porta den Oranjestad na 1920. Despues cu esaki a kima tres biaha, a dicidi pa no construye bek mas. Te awor, cu tin e compleho cu ta haya su nomber. 

KICO TUR TIN

Mientras cu e enfoke principal ta cine, (tin 10 auditorio dividi den 6 sala regular, 3 VIP y 1 di IMAX (experiencia di pelicula via proyector laser) cu sin distanciamento social (COVID19 Free tin lugar pa 1100 hende total y cu distanciamento social 700 hende) , tin tambe 3 restaurant renombra, esta e conocido mundialmente P.F Cheng, Mangiamo, y Sizzle. Cada uno ta atende un diferente clientela, y na tur ta duna espacio pa 419 hende come (teniendo na cuenta distanciamento social segun regla pa COVID19). E parkinglot ta bon pa 300 auto, y ta bira acesible via un brug cu a wordo traha specialmente pa esaki door di MetaCorp, cu ta pasa riba e canal, pa asina facilita tur automobilista cu ta usa Sasaki. De hecho, por yega e facilidad di tur skina di Aruba. E hecho cu e proyecto aki ta habri mei mei di un pandemia, y a ofrece trabou pa riba 100 hende durante COVID19 (y despues 100 hende mas ora cu e pandemia bira controlable) sigur hopi ta aplaudi y a mustra esaki riba rednan social den fin di siman ora cu a comenta riba e bishita VIP di prensa e fin di siman aki. Diadomingo anochi, Noticiacla ta presenta un programa special cu tur detaye riba e compleho aki, cu ta pasa pa 7’or riba Facebook di noticiacla, y e app y Website tambe.