Aruba Entertainment 2020 disgusta cu Crisis Team ta bolbe perhudica nan

ORANJESTAD – E asociacion di artista Aruba Entertainment 2020 ta duna Crisis Team 5 dia pa bin cu un solucion pa nan, sino ta evalua pa bay corte. Asina e presidente di e asosacion Ofo Escudero a bisa durante un conferencia di prensa diabierna atardi. Nan a sali for di un reunion cu rampenbureau, y a atende cu prensa e ora ey. Nan ta hopi rabia mirando e hecho cu diabierna crisis team a cambia medidanan pa COVID19 atrobe cu a perhudica nan directamente. Algo cu nan no ta dispuesto pa wanta mas. 

E SITUACION

Manera ta conoci, diabierna mainta prome minister Evelyn Wever Croes a anuncia un serie di medida nobo cu ta afecta entre otro e grupo di musico directamente. Esaki pasobra a bolbe prohibi bandanan completo di toca pafo, y a limita esaki na 3 integrante tanto pafo como paden di un establecimento. Algo cu dos siman pasa ainda tabata 5 artista, musico paden y e banda completo pafo. Pero e aumento den caso a pone cu mester a adapta e situacion atrobe. 

INCOMPRENDIBEL

Segun Escudero, pa culpa di otro, nan ta wordo perhudica atrobe. Ta considera e manera di tuma decision, mucho facil cu e musiconan no ta conta pa Crisis Team. Pa Escudero , ta parce cu e musiconan no ta importante. E motibonan cu ta usa pa tuma medida, ningun motibo tin di haber cu e mundo di entretenimiento. Y como tal segun Escudero, e medida contra e musiconan no ta husto. A usa como ehempel con a acomoda bendemento di kerstboom grandemente, cu nan por a sigui gana placa. Algo cu nan ta aprecia. Di otro banda, nan ta wordo perhudica atrobe. Nan ta usa como ehempel di e problema, cu ta biaheronan awor ta parce di ta e problema, refiriendo na e conteo di un dia anterior unda cu 50% di esnan cu a sali positivo, tabata hendenan cu a bin di afo, tanto local como no residente. Pues, e problema segun nan, no ta unda cu Crisis Team ta bisa. 

PENSAMENTO OTRO

Ta conoci cu pa Crisis team, e problema no ta na aeropuerto, sino cluster na casnan, y pia di trabou unda cu hendenan no ta tende y ta haci manera cu nan kier. Pa evita e plamamento mas, a dicidi pa limita cantidad di hende sinta na mesa na 8 paden y 10 pafo. Esaki te cu siman pasa ainda tabata 14 paden. Ora cu e portal aki a puntra e prome mandatario e logica pa cual ta permiti solamente 3 musico banda di otro riba stage, pero si 10 hende bandi otro na mesa, e la bisa cu esaki mester check cu e expertonan di Crisis Team. Pues no tabatin un contesta concreto riba esaki diabierna mainta.