DVG: Diferente turista ta purba bandona Aruba cu santo blanco of cocolishi, cu ta ilegal!

ORANJESTAD: Den e ultimo lunanan cu a pasa, departamento di douane na aeropuerto a intercepta diferente turista cu na momento di regresa nan pais, kier hiba cu nan cocolishi, santo blanco y coral for di nos naturaleza.

Conforme e tratado international di CITES y nos leynan local manera e landsbesluit bescherming inheemse Flora & Fauna y e Zandverordening, ta prohibi pa saca y exporta cocolishi, coral y santo blanco for di Aruba pa proteha nos medio ambiente.

E cantidad di cocolishi, coral y santo blanco confisca ta hopi straño y ta sospecha cu hende local of residente lo por ta ofreciendo esakinan na benta cu e turistanan locual ta prohibi.

Ora e turistanan yega aeropuerto nan ta wordo confronta cu un boet y e material ta wordo confisca. Esaki sigur no ta un experiencia agradabel pa e turista na momento cu eta bandona nos isla. Esaki por conduci na reaccionnan negativo cu ta pone Aruba su sector turistico den un luz negativo

Ban hunto duna nos naturaleza e respet cu e merece pa asina proteha nos medio ambiente, stop di colecta cocolishi, santo blanco of coral for di nos naturaleza y stop di ofrece turista esakinan. Ken no kier pa nos futuro generacion y turistanan por gosa di nos beachnan, cocolishi y coral? Ban hunto proteha loke ta di nos.