Polis tabata ‘supervisa’ benta di kerstboom awe mainta ainda

ORANJESTAD – Cu polis supervisando e benta, clientenan tabata para den rij largo atrobe diabierna mainta den Vondellaan pa bin sea busca nan kerstboom paga caba, of paga y bay cu ne (si a resta). Despues cu dos dia pasa e benta a casi bay for di man, polis y DVG a dicidi di actua y regla e asunto miho. Esey kier men cu for di ayera, (y awe mainta atrobe) polis tabata staciona strategicamente pa ‘tira un bista’ riba e benta di kerstboom na e lugar aki (Kerstboomlandia). E rij tabata basta largo awe mainta, pero cos tabata visiblemente ‘mas organisa’. A dicidi di cera parti di Vondellaan cu baricada pa asina trafico no stagna atrobe. Tabatin baricada p.e. na parti di e rotonde na altura di Banco di Caribe. Awe mainta mientrastanto gobierno lo anuncia medidanan ‘nobo’ pa cu COVID19 pa evita mas brote riba e isla.