Wever Croes: Si huridicamente resulta robez cu minister a transferi hende pa DVG, lo cambia esaki bek

ORANJESTAD – E decision sugeri pa minister Dangui Oduber y aproba pa conseho di minister na September di move 5 persona di su despacho pa DVG pa sigura continuacion di transporte pa pashent di dialyse, no ta necesariamente toca e aspecto di integridad. Por lo menos no awor. Asina Minister Evelyn Wever Croes a bisa den e programa Noticiacla LIVE diahuebs mainta. Berdad cu a tuma decision bou di presion di tempo y pa no hinca e cantidad di pashent cu ta depende di transporte, den peliger (di posibel morto den caso extremo). Y un conseho despues di departamento di recurso humano lo tin cu determina e ‘validez’ di e decision aki. Y aki enberdad e por resulta algo no corecto. Pero awor e no ta asina. 

BIRA COS BEK

E mandatario a sigura cu pa awor, tur cos ta ok, y e decision tuma bou di presion, a sigura continuidad den e operacion di transporte cu AZV dado momento a para na mei ultimo. Esaki pa corta entre otro gasto di 5 miyon riba orden di Hulanda pa Aruba por a sigui haya fondo. E ora gobierno mester a tuma un decision urgente pa evita cu pashentnan cu ta haya transporte pa dialyse, no sufri. A splica ademas tambe cu pashentnan di dialyse no por keda mas cu 48 sin e tratamento, sino nan sanger ta venena cu posibel resultado fatal. Pensando riba esey, a actua lo miho posibel. Segun e mandatario, no tabatin tempo pa bay habri proceso di vacatura y solicitud, pero a opta mas bien pa resolve e asunto di e manera mas practico segun nan. E critica cu e personal awor porta no ta completamente prepara, ta un hecho segun e mandatario y e ta compronde esey. “Pero e momento ey in time, no tabatin espacio ni tempo pa nada”. Esey a resulta cu e trahadornan awor ta bay traha otro caminda cu un contract di 5 aña.  

INTEGRIDAD OF NO

E mandatario tambe a splica e parti di integridad den sentido cu no por djis yama tur cos cu ta kere cu supuestamente ta malo of ta hole malo, pa algo contra integridad. A uza un sentencia di huez di algun aña pasa cu a considera e palabra en cuestion como un ‘container begrip’, cu ta nifica cu tur hende tin e tendencia di uza e palabra asina facil, te cu ningun hende mas ta dune un contenido cu e merece. Y aki e ta mustra cu esaki ta e caso aki. “Si nos, pa cada cos, bisa cu e no ta integridad, anto e ora nos tin un problema serio. Pasobra nunca nos no ta bay yega unda cu nos mester” sra Wever Croes a sigui splica. 

DECISION FINAL 

A bisa tambe cu e decision final no ta tuma ainda, pues si resulta despues cu e conseho huridico bin bek negativo, tin cu bay ‘draai bek’ e situacion lo tin cu haci esaki. “E malo cu e ta, contra integridad, no no no.. no ta asina. E personanan cu ya caba tabata riba payroll, nan trabou a wordo tuma pa otro hende, kier men cu pa loke ta financieel no tabatin consecuencia te cu ainda” e mandatario a sigura noticiacla.com. E diferencia ta bay sinta cu ora cu MEP sali di gobernacion, esta esnan cu a bin cu e gobierno, ta bay cu e gobierno. Esey ta e punto di salida segun e mandatario. “Anto cu si e grupo aki keda atras, e ora bo por bay bisa cu bo tin un decision cu no tabata corecto” e mandatario a sigui bisa. Y ta pesey a pidi recurso humano pa e conseho y e ora ta tuma un decision final.